Shillong, Jylliew, 14: Ka jingniah kali khlemakor bad ka jingpynher stet shaba palat jong ki nongniah kali ka dei kawei na ki daw kaba ju wanrah bunsien ia ki jingjia kiba sngewsih khamtam ha ka surokbah National Highway-6 ha Ri Bhoi District. Ha kawei ka jingjia ha ka Sngi Thohdieng ha ka por kumba 1:00 baje mynstep ar ngut ki mynsiem briew ki la duh ei ia la ka jong ka jingim tang na ka daw ka jingpynher sted bad niah khlem akor shaba palat jong u nongniah kali.
Katkum ka khubor ba la iohlum na ki Pulit jong ka Ribhoi District la iathuh ba u nongniah jong kawei ka kali kamai kaba don ia u number ML05 N0174 kaba mih na Shillong ban leit sha Guwahati u la pynher stet haduh katta katta kat haduh ba u nongniah um lah shuh ban synshar u la kam bad leit tynrah beit ia u Divider jong ka surok bah bad thung khongpong sha shilliang surok.
Ki Pulit ki la iathuh ba ha kane ka kali ba la ñiah da u Bah George Kharkongor na ka shnong Nongrah ki ruh sa lai ngut kiwei pat ki nongleit jingleit ia kiba la tip kyrteng kum u Banrap Marboh na ka shnong Mawlynrei, East Khasi Hills, u Bah Frick Kharkongor na ka shnong Nongrah, East Khasi Hills lem bad u Leuwis Kharkongor na ka shnong Lapalang, East Khasi Hills.
Ki riew paidbah kiba la sakhi ia kane ka jingjia, ki la pynkit noh ia kine kiba mynsaw sha Nongpoh Civil Hospital na ka bynta ban ioh ia ka jingsumar kyrkieh, katba ia u Bah Banrap Marboh uba la thiah lyngktar ryngkat ka jinglyngkien jong ka snam bad ha ka jingbym tip briew shuh la pynkit noh da ki Pulit, ha kaba ki doctor jong ka Civil Hospital Nongpoh, ki la pynbna ba u ladep khlad lypa.
Shuh shuh, ka khubor na ki Pulit ka la iathuh ruh ba ki doctor ka Civil Hospital Nongpoh ki la pyntip ba u Bah Leuwis Kharkongor u dei uba shu mynsaw malu mala katba u Bah Frick Kharkongor u dei uba la kham jur ka jingmynsaw bad la pynkit noh ia u sha Civil Hospital Shillong na ka bynta ban ioh ia ka jingsumar kaba kham bha.
Kham hadien, ki Pulit ki la ioh jingtip ba u Bah Frick Kharkongor ruh u la khlad noh ha Civil Hospital Shillong namar ka jingjur shaba palt ka jingmynsaw.
Halor kane ka jingjia, Pulit, ki la rah noh ia ka kali sha thanad Nongpoh na ka bynta ban pynlong ia ka jingtohkit bad ruh ban pyndep ia ki jingdonkam katkum ki kyndon jong ka ain.
