Shillong, Jylliew, 17: Ka jingther jong u lapbah bajur naduh ka miet sngi Thohdieng jong ka taiew baladep haduh ka step Sngi u Blei mynta ka taiew ka la wanrah shibun bah ki jingjot bad jingjulor ha kiba bun tylli ki shnong ha South West Khasi Hills District, kata, naduh ki ïing ki sem, ki lynti synkien bad kumjuh ruh ki surok na ka jingtwa jong ka khyndew ha kiba bun ki jaka.
Katkum ki jingtip ba la ioh lum, la iathuh ba tang ha ka shnong Mawbidong ki la don haduh san tylli ki ïing kiba la shah pynjot, lai tylli ha ka shnong Manad, kawei ha ka shnong Lummawbah, ar tylli ha ka shnong Mawpud, kawei ha ka shnong Sarin bad kawei ha ka shnong Mawkhlaidngap bad na kine ki jingjia, kumba 70 ngut eiei ki paitbah nongshong shnong ki la shah ktah.
Ka khubor ba la ioh lum ka la iathuh ba watla ka jingshah pynjot jong ki ïing ki sem ka la jur bha na ka jingtwa khyndew bad ka jinglied ka eriong ia ki ïing ki sem hynrei kam shym la don pat kano kano ka jingjia basngewsih.
Shuh shuh la iathuh ruh ba ki ar tylli ki lynti iaid kjat ba la shna na ka skhim MGNREGS ha ka shnong Sarin bad ha ka shnong Mawpud ki la shah pynjot na ka jingther jong u lapbah. Ka surok Mawrap-Mawsain ruh ka la dkut noh na ka jingtwa jong ka khyndew ha kawei ka jaka harum ka shnong Jerlang, kaba jngai kumba 17 kilomitar eiei na Mawkyrwat.
Katkum ka jingiathuh u Myntri Shnong jong ka shnong Mawbidong, u Bah Tanlum K. Kharai la ong ba ka surok Photjaud-Manad, kata, naduh na Tynnai ter ter haduh haduh ka shnong Mawbidong, ka la jot lut na ka jingtwa khyndew bad kumjuh na ka jingksam thliew jong ka um slap ha ki babun ki jaka jong ka surok.
