Shillong, Jylliew, 21: Ki dkhot jong ka Hynñiewtrep Integrated Territorial Organization (HITO), Shillong City ha ka miet sngi Palei ki la ioh bat saw ki shynrang bad kawei ka kynthei ba la suba ba ki nongkhaii bad nongdih drok ha Khyndai Lad, Shillong.
Katkum ki video ba la ring hi da ki dkhot ka HITO bad ba la phah sha ka Batesi Tv, la sakhi ba ki la ioh ban kurup ia ki tari rit, ki screw driver, ka khaiñshi, 11 tylli ki tyndong rit thylli ba ju thep ia u drok, saw tylli ki tyndong ba dap da u powder rong soh ba la suba ba u dei u drok, 7 tylli ki thyrnia injekshon bad u Ganja.
Hadien ba la ioh bat ia kine ki suba nongkhaii bad nongdih drok, ki dkhot ka seng ki la pyntip noh sha ki Pulit ban leh ia kaba donkam bad kumjuh ruh ban kurup noh ia ki tiar kiba ka seng ka la na kine ki briew.
Ka jingpynap shrip jong ki dkhot ka HITO, Shillong City ka long hadien ba la ioh jingtip ba ki ju don ki nongkhaii drok kiba ju leit da ki thuk thuk ar shaka ban pynpoi ia u drok ha Khyndai Lad.
U General Secretary jong ka HITO Shillong City Bah Balajied Jyrwa ha ka jingiakren bad ki lad pathai khubor u la kyntu ia ki Pulit ba kin long kiba peitngor bha khamtam eh ha ka por mynmiet namar ka jingkynrei ki kam sniew ha ka thain Khyndai Lad ka jur bha haduh katta katta.
Ha ka jingtohkit da ki dkhot jong ka seng, ki nongdih drok ki la phla ba ki thied ia u drok na uwei u briew uba ju khot sien u Boit bad ia ki thyrnia injek ki ju ioh na ki jaka sumar ia ki nongdih drok kiba don ha nongbah Shillong bad wat na ka Hospital sorkar.
