Shillong, Jylliew 22: U Wanbok Lyngdoh Mawphlang bad ka Marqueenless Ramsiej ki la long ki arngut ki lahduh ha ka jingiakop mareh thong jong ka 5th Shillong 10K Run, ba la pynlong da ka Meghalaya State Olympic Association, ha ka step 22 tarik Jylliew, 2024.
Ka jingpynlong ia kane ka jingiakob mareh ka long kum shi bynta ban rakhe ia ka International Olympic Day, ia kaba la ju rakhe manla u snem ha ka 23 tarik Jylliew kaba dei ka sngi ba la pynkha ia ka International Olympic Committee ha u snem 1894.
Ha kane ka jingiakob mareh ha ka liang jong ki shynrang, u Iwelljohn Ramsiej u la poi ha ka kyrdan kaba ar bad u Sainkupar Jyrwa u la poi ha ka kyrdan kaba lai.
Ha ka liang jong ki kynthei, ka Balasiewdor Pathaw ka la poi ha ka kyrdan kaba ar bad ka Ivanjilin Khongwir ka la poi ha ka kyrdan kaba lai.
Ha ka jingiakob mareh jong kiba la 50 snem ka rta ha ka liang jong ki shynrang u Bah Badon Tham u la jop ia ka kyrdan kaba nyngkong, katba u Bah Swonding Mawlong bad u Bah Laurence Pariong ki la poi ha ka kyrdan kaba ar bad kaba lai.
Ha ka liang jong ki kynthei, ka Kong Ralinda Marbaniang ka la jop ia ka kyrdan kaba nyngkong, katba ka Kong Smarless Marwein ka la poi ha ka kyrdan kaba ar bad ka Kong Ibameri Shullai ka la poi ha ka kyrdan kaba lai katba ka Kong Kmoin Wahlang kaba la kynjoh ha ka rta kaba 70 snem eiei ka la poi ha ka kyrdan kaba saw.
Ia kane ka jingiakob mareh la kaweh lama da u Assistant Director jong ka Department of Sports and Youth Affairs, u bah Paia B. War Nongbri, ryngkat ka jingsakhi lang jong u General Secretary ka Meghalaya State Olympic Association u Bah Finely L Pariat bad kiwei kiwei.
