Shillong, Jylliew, 23: Ka Khasi Students Union (KSU) East Jaiñtia Hills District Unit hynnin ka sngi Saitjaiñ ka la aiti da ka jingujor ha u Additional Deputy Commissioner jong ka East Jaiñtia Hills u Bah G. Warjri halor ka jingthombor jong ki shipai BSF ia ka longiing jong ka Kong Martina Pohshna ha ka shnong Kuliang ha ka 19 tarik mynta bnai ha ka por shiteng synñia.
Ha ka jingujor, ka seng ka la dawa ban pynshitom katkum ka aiñ ia ki BSF ba donkti ban leh da kaba tyngeh.
Hadien ba la mih na kamra u ADC, ki dkhot ka seng ki la leit jngoh ia u Bah Shanroi Lyngdoh Lyngkhoi u kurim jong ka Kong Martina uba la shah shoh ha ki BSF uba dang thiah pang ha Civil Hospital Khliehriat uba la mynsaw jur na ki jingorpait ki shyieng krung
Ka KSU ka la pynrem jur ia ki BSF kiba leh donbor ia ki paidbah ha ka shnong Kuliang ha ka por shiteng synñia da kaba shoh bad bom ia ki kynthei khynnah bad ia ki rangbah khlem map shuh kaba ju jia na ka por sha ka por.
Kane ka jingleh donbor kine ki BSF kam dei shuh ka sien ba nyngkong hynrei la bunsien. Ki paid nongshong shnong ka Sonapyrdi, Huroi Umkiang ki la ujor bunsien sha kiba dei khmih naduh u SP bad u DC, hynrei kine ki khlem leh eiei bad ka shu kut khlem seisoh, la ong ka seng.
Kane ka la pynlong ia ka Seng ba la lamkhmat da u General Secretary Bah KS Suchiang, Asst GS Pynshai Kupar Dkhar ban leit ujor sha ka Director General of Police (DGP) ka jylla ban leh eiei ban pynkynriah ia kine ki BSF kiba ha Sonapyrdi bad kiba don ha surokbah NH-6 ha khappud jong ka shnong Dona Umbluh bad Ratachera namar ka jingdon jong ki ha kito ki jaka kim lah satia ban tehlakam ia ka jingwan rung tuh ki khar Bangladeshi sha ka jylla.
Kum ban pynkynmaw ka seng ka la dep iakren bad u Bah Prestone Tyngsong uba dei u Symbud Myntri Rangbah ka jylla uba khmih ia ka tnat Kam Pohiing hynrei kam shym la poi shaei shaei ruh ka kut tang ka kular.
Ka seng ka nang iai buddien ia kane ka jingleh donbor ki shipai BSF ia ki paidbah bad ka khmih lynti ba ka DGP kan leh ia kaba dei tam.
Lada kam urlong ka jingdawa pynkynriah ia ki BSF na kitei ki jaka, ka seng kan sa pyrkhat da kawei ka sien jam.
