Shillong, Jylliew 26: Haduh 610 ngut ki briew kiba la shah kem na ka jingdonkti ban khaïi drok uba shongdor kumba T. 300 klur ha Meghalaya ha kine ki ar snem ba la leit noh.
Ïa kane la ïathuh da u Myntri ka tnat Social Welfare u Bah Paul Lyngdoh ha ka jingkren jong u ha ka jingïakynduh lang ki nongshong shnong ne ka multi-stakeholder symposium ba la pynlong da ka Drug Reduction Elimination & Action Mission (DREAM) kum ka dak ka jingrakhe ïa ka International Day against Drug Abuse and Illicit Trafficking ha ka sngi Balang. Ha kane ka snem ka phang jong ka jingïakren ka dei, “The evidence is clear: invest in prevention”.
Halor kane haba kren sha ki lad pathai khubor u Bah Lyngdoh u la ong ba ka dang don bun ka kam ban leh bad dei halor kane ba balei ka sorkar jylla ka la rai ban pynïasnohkti lang ïa ki nongïalam shnong ban iarap lang ïa ki pulit ban ïakhun pyrshah ïa kane ka thma u drok.
Kaei kaba duna naduh mynshwa kadei ka jingbym ïashim bynta lang jong ki nongïalam shnong. Wat la ka la don hynrei ka duna bha bad ka jingïasyllok bad ki shnong ki thaw bad ba kin don bynta lang ha ki kam thaw aiñ, ha kaba kane ka long kaba donkam ïa ka sorkar ruh ban don ki nongïalam ki ban ai ka jingkyrshan ïa ki pulit khnang ban lah ban pyntreikam ïa ki aiñ ki ban ïakhun pyrshah ïa u drok,” u la ong.
“Kum ka nuksa, ka PITNDPS, kam lah ban treikam lada ym don ka jingïasnoh kti lang jong ki nongïalam shnong ne ki shnong ki thaw, bad dei halor kane ba ki dorbar shnong la kyrpad ba kin wan shakhmat ban ai jingmut na ka bynta ban thaw ïa ki Village Defence Party (VDP),” u la bynrap.
U Bah Paul u la ong ba ka jingthaw bad pynim biang ïa ki VDP kan sa long shen hadien ba ka sorkar ka la lum ïa baroh ki jingai jingmut na ki dorbar shnong ha kaba ïadei bad kane ka Act kaba thew ïa ka jingthaw ïa ki VDP.
“Ngi dei ban lum lang ïa baroh ki jingai jingmut hapoh u ne u bnai,” ong u Bah Paul.
Kumba ka long mynta ki don tang 11 tylli ki VDP kiba dang treikam hapoh Nongbah Shillong, ong u Bah Lyngdoh da kaba bynrap, “Kiba bun ki shnong kim don ïa ki VDP hynrei da ka jingwan ïashim bynta ha kane ka symposium, la ïohi ba ka long kaba ai mynsiem bad la khmih lynti ïa ki ba kin thaw ïa ki VDP ka ban ïaid lang bad ka aiñ.”
U Bah Paul u la ong ba ka donkam ka jingïarap pisa ïa kine ki dorbar shnong khnang ba kin lah ban pynkhlaiñ ïa ki VDP bad ïa ki volunteer jong ki.
