Shillong, Naitung 06: Ka Khasi Students Union, CEC ryngkat ka KSU North Khasi Hills District Unit ha ka sngi saitjaiñ ba la lamkhmat da u President u samla Lambokstar Marngar bad u General Secretary u samla Donald Thabah ki la hiar sha ka thaiñ Ri Bhoi ban pyni bor ia ka Sorkar Jylla da kaba pynïeng ïa da ka khyrdop ILP ha ka shnong 20 Mer Pahammawleiñ, ha surokbah National Highway-6 ha Ri Bhoi.
Ki dkhot ka seng ki la talasi naphang ïa ki kali bad ïa ki bar jylla kiba wan rung shapoh ka jylla ban tohkit ia ki kot ki sla bad pynphai kylla ruh ïa ki bar jylla ki bym don ia ki kot ki sla kiba biang.
Tang shu ïoh jingtip ia kane, ki Magistrate bad ki Pulit ka Ri Bhoi ki la hiar ban leit ïakren ïa ki nongïalam jong ka KSU halor ka jingpynïeng ïa ka khyrdop ILP.
Hadien kane, ki dkhot ka KSU ki la leit jurip ruh ïa ka Facilitation Centre ba la tei da ka Sorkar ha Umling ha kaba la lap ba kane ka khyrdop talasi mynder kaba la pynkylla kum ka jaka leh test Covid-19 ka la kylla long ka iingjah bad ka ktem riehtngen jong ki riewsniew.
U samla Lambokstarwell ha ka jingïakren bad ki lad pathai khubor u la ong, ka KSU ka ladep ban dawa ruh ban pyntreikam ïa ka ILP bad ban pyntreikam ïa ka aiñ MRSSA ban khanglad na ka jingwan rung beaiñ ki briew kiba na shabar, hynrei kumba long haduh kine ki sngi, ka sorkar ka leh sting bad leh bym suidñiew kumta ka seng kam banse ban pynieng pynïeng noh ïa kane ka khyrdop ILP.
“Kane kam dei ka sien ka banyngkong ba la pynïeng ïa ka khyrdop ILP da ka seng bad la bunsien ngi la pynïeng ïa kine ki khyrdop ILP. Ka daw ka long ban tehlakam na ka jingwanrung kynthep ki briew kiba nabar khlem da don ki kot ki sla kiba paka. Ka KSU ka dawa mardor na ka Sorkar India ba ka dei ban ai noh ïa ka ILP ban pyntreikam ha ka jylla bad kumjuh ruh ka sorkar Meghalaya ka dei ban pyntreikam noh ïa ka MRSSA ha ka jylla bad lada ka Sorkar ka dang buhteng, ka seng kan dang bteng ban buh kum kine ki kyrdop na ka bynta ban tehlakam na ka jingwan rung kynthep ki briew kiba na shabar ka jylla.
Ha kaba iadei pat bad ka Facilitation Centre, u President ka KSU u la ong ‘kan myntoi aïu ba ka Sorkar kan tei ïa ka Facilitation Centre ha Umling kaba ym lah pat ban pyntreikam bad ka long tang ka jingpyrsyrwa ïa ka pisa u paidbah da ki klur tyngka.”
U la kynthoh ruh ba ka jingdon jong ka Anti-Infiltration Check Gate jong ka Sorkar ha ka shnong Byrnihat ka long tang kum ka shynrong ba khlem jabieng namarba ka jingtalasi ïa ki kali bad ia ki briew kiba nabar ka jylla ka shu long kaba malu mala bad ka bym da pyrkhing satia.
