Shillong, Naitung, 08: Ki dukan jong ki bar jylla ki la shah khynra Trading License bad Labour License ha ka thaiñ Polo ha ka Lah Sngi u Blei ha ki bor ba dei peit jong ka Shillong Municipal Board (SMB), Khasi Hills Autonomous District Council (KHADC), tnat Food Safety, tnat Labour ryngkat ka jingsynran jong ki dkhot ka Federation of Khasi Jaintia and Garo Peoples (FKJGP.
Ha kane ka jingkhynra, bun tylli ki dukan jong ki bar jylla ki la shah khang khyrdep namar ka jingbym pynthymmai shuh ia ka License ba ki la ioh na ka Shillong Municipal Board bad na ka District Council wat hadien ba la kut ka por. Ki don ruh ki nongbylla bar jylla kiba la shah hukum ba kin sangeh ka treikam treijam namarba kim don satia ia ka Labour License.
Ha ka jingiakren bad ki lad pathai khubor ki nongialam jong ka FKJGP ki la ong, ba katkum ka Meghalaya Identification, Registration of Migrant Workers Act, 2020 ka la kdew shai ba kino kino kiba aikam ia ki nongbylla kiba nabar ka jylla ki dei ban pynrung kyrteng ha ka tnat Labour.
Ki la ong ruh ba kin sa leit ban iakynduh ia u Chief Executive Officer (CEO) jong ka Shillong Municipal Board (SMB) ban buddien halor ka jingbym patiaw jong ki bar jylla ban pynthymmai ia ka Trading License wat hadien ba ka por ka la kut.
Ki Pulit Enforcement jong ka KHADC ki la hiar ban khynra ia ki Trading License bad Labour License ha ka shnong Demseiñiong bad ha Nongmensong kiba dei ki shnong kiba dang hap hapoh u pud u sam jong ka Council.
La lamkhmat ia ka kynhun jong ki Pulit Enforcement da ka License Officer ka KHADC Incharge ka East Khasi Hills District u Bah Refreshal Shabong bad u Additional Superintendent ka tnad Enforcement jong ka KHADC u Bah H. Syiemlieh.
Ha ka jingïakren bad u Bah Refreshal Shabong u la iathuh ba ka jingkhynra laisen ha kane ka sngi ka dang long tang ia ki dukan jong ki bar jylla kiba don ha ka shnong Demseiñiong bad u la iathuh ba ia mynta um pat lah ban ai ia ka jingkheiñ ba thikna katno tylli ki dukan jong ki bar jylla kiba don bad ki bym don ia ka Trading License.
