Shillong, Naitung, 08: Ka Employment Monitoring Cell jong ka Khasi Students Union (KSU) ha ka Lah Sngi U Blei ka la leit ban iakynduh ia u Chairman jong ka Meghalaya Public Services Commission (MPSC) ban pan jingpynshai halor ka jingpynmih result jong ka post Statistical Officer ha ka tnat Animal Husbandry and Veterinary (AH&Vety).
Kane ka jingdawa jong ka seng ka long hadien ba la iohi ba ka MPSC ka la jied ia arngut ki samla, uwei na ka thup Khasi-Jaintia bad uwei na ka thup Garo katkum ka jingpynbna (notification) ba lah pyllait ha 27 tarik, Jylliew, 2024.
Ha u kyrwoh ba la phah da u Information & Publicity Secretary jong ka KSU u samla Pynshai Rani u la ong, “kaba sngewlyngngoh ka long ba katkum ka Advertisement ba la pynmih ha ka 14.12.2020 pat, ka jinglaitkam ka dei tang na bynta kawei ka post bad ia kane la pynskhem biang da ka jingpynbeit (Corrigendum) ba la mih ha ka 14.09.2022 kaba dei ban long thik tang ia kawei ka post na bynta thup Khasi-Jaiñtia.”
“Ka MPSC ka la pan bor ban ai jingpynshai halor kane ka bynta bad na ka liang jong ka seng ka la maham ba ym pat dei ban thung ia kane ka Post katba ym pat ioh ia ka jingpynshisha halor kane ka kam,” la ong u kyrwoh.
