Shillong, Naitung, 09: Ar sngi hadien ba ka Khasi Student Union (KSU) ka la pynieng ïa ka khyrdop Inner Line Permit (ILP) ha surokbah NH-6 ha ka shnong 20 mer, Pahammawleiñ Ri-Bhoi District, ka khyrdop ka la shah pynpra noh ha ka step sngi Baar bad ki banner ruh ki la shah thang.
Ka KSU ka la kynnoh ba ïa kane ka kam la leh da ki Pulit jong ka Ribhoi District.
U General Secretary jong ka KSU u samla Donald V. Thabah ha u kyrwoh ba la phah sha ki lad pathai khubor u la ong katkum ka jingïoh jingtip jong ka seng na ki riewpaidbah, ki Pulit ki la kyndang da ka puhshilum ïa ka khyrdop ILP ba la pynieng da ka KSU ha ka por kumba 11:00-11:30 baje mynstep bad ynda ladep pynpra ïa ka khyrdop la thang lut ïa ki nadong shadong ïa ki tum ki tam.
Ka KSU ka la pynïeng ïa khyrdop ILP ha ka sngi Saitjaiñ ba la lamkhmat da u President rangbah u samla Lambokstarwell Marngar President bad u General Secretary u samla Donald Thabah. Ha kane ka sngi, ki dkhot ka seng ki la pynlong ruh ka jingtalasi naphang ïa ki kali jong ki riewpaidbah kiba wan na kiwei kiwei ki jylla kum ka jingpyntreikam ïa ka ILP halor ka jingleh kuman ka Sorkar Pdeng ban mynjur ïa ka ILP ha Meghalaya bad ka jingbym lah jong ka Sorkar Jylla ban pyntreikam ïa ka Meghalaya Residents Safety and Security Act (MRSSA) ban tehlakam ïa ka jingrung bad ka jingmih laitlan jong ki mynder.
