Shillong, Naitung, 10: Katto katne ngut ki longkmie kiba don ka jingsngewkhia halor ka jingshah shukor ha uwei u rangbah uba hikai ïa ka jingïalehkai Martial Art ia uba la tip kyrteng kum u Bah Donnie Rani uba pynïaid ïa ka skul hikai Karate, Kickboxing bad kiwei de ki jingïalehkai, ka skul kaba la tip kum ka Meghalaya School of Martial Art, kaba don ha ka shnong Laitkor ha ka dong Kynton U Mon.
Ha ka jingiakren bad ki lad pathai khubor ha ka sngi Baar, kine ki longkmie kiba kynthup ia ka Kong Sylvia Dkhar, ka Kong Jessica Blah, ka Kong K.Nongkhlaw bad kawei pat longkmie kiba na ka shnong Kharang, ki la kynnoh ba dang ha ka lympung ïakob kaba dang dep long shen ha Deradun, watla ka jingïakob jong ki khynnah rit kiba hap hapoh ka Category Sub Junior kam shym la don satia ka jingïakob, hynrei u Bah Donnie Ranee u la shukor ïa ki ba ka don kane ka jingïakob ha kaba ki kmie ki kpa ki la pynlut ia ka bai leit bai wan jong ki khun namar ynda la poi sha ka lympung ïakob kam shym la don satia ka jingïakhun ha ka Category Sub Junior.
Kawei pat ka bynta kaba kine ki longkmie ki la kynnoh pyrshah ïa u Bah Donnie Ranee ka long halor ka jingdawa jong u ia ka bhah na ka pisa jong ki khynnah kiba jop ha ki jingïakob shabar jylla, kiba ïoh khusnam pat na ka sorkar Meghalaya, ha kaba ula dawa ban ioh bhah 10 percent na kiba ki ïoh bad 5 percent na ka Scholarship ba ki ïoh na ka sorkar bad ia kito kiba kyntait ban siew ia kaba u dawa, u beh noh ïa ki.
