Shillong, Naitung, 10: Ka Kynhun Myntri jong ka Sorkar Jylla ha ka sngi Balang ka la mynjur ïa ka jingtyrwa ban pyntreikam ïa ka skhim jong ka Sorkar Pdeng na ka bynta ban ai jingkyrshan pisa ïa ki koidi ki baduk kiba shah set ha ki along bapher bapher ka jylla.
U Myntri Rangbah ka Jylla u Conrad Kongkal Sangma u la ïathuh ba kane ka dei ka skhim jong ka Sorkar Pdeng bad ka Sorkar Jylla la shu pyntreikam ïa ka pisa bad ka jylla kam donkam eiei ban siew shi naïa ruh namarba ïa ka pisa la siew lut nadong shadong da ka Sorkar India.
“Kane ka skhim ka thmu beit thik tang ïa ki koidi kiba wan na ki longiing kiba duk, kiba dang shah set along bad ki bym don pisa ban pan jamin khnang ba kin dup lait noh na ka jingshah set along ne ban ïakhun ïa ki mukotduma,” ula ong.
“Ngi la pynkhreh ïa kane mynta la khyndiat bnai bad mynta ngi long kiba la khreh ban pyntreikam noh bad la mynjur ruh mynta ka sngi da ka kynhun myntri ban pyntreikam ïa kane ka skhim,” la ïathuh u Myntri Rangbah.
