Shillong, Naitung, 11: Ki Pulit jong ka East Jaintia Hills District ha ka sngi Palei ki kem ia uwei u briew ba la suba ba u dei uba donkti ha ka jingshah pyniap jong ki saw ngut ki briew ha kaba ia ki metiap la lap ha ka shnong Umpleng, East Jaintia Hills District ha ka step 6 tarik Naitung, 2024.
Halor kane ka jingshah pyniap jong ki saw ngut ki briew, ki Pulit ki la register case hapoh ka Section 103/3 (5) jong ka BNS bad ka jingtohkit ka dang iaid shakhmat ban iohkem sa ia kiwei pat kiba donkti ha kane ka jingjia.
Kum ban shu pyntip hangne, napdeng ki saw ngut kiba la shah pyniap, lai ngut ki dei kiba la ithuh kyrteng kum u Ravi Rai, 23 snem ka rta na ka shnong Elam, Mechipradesh, Nepal, u Rajesh Rai, 26 snem na ka shnong Dharan Sunsari, Koshi Anchal, Nepal bad u Nasar Kyndait, 33 snem na ka shnong Dkhiah East Pohshnong, East Jaiñtia Hills District.
Katba ia uwei pat uba dang don haduh mynta ha ka jaka buh metiap ha Khliehriat Civil Hospital, ym pat don satia ban kam trai mano mano ruh.
