Shillong, Naitung, 11: Ka Federation of Khasi Jaiñtia and Garo People (FKJGP) Central Body ka pynrem jur ia ka jingkren laplah bad jingkren khyllung khynnah jong u Myntri Rangbah ka Jylla u Conrad Kongkal Sangma ban ong ba ‘Ym donkam Work Permit ha Meghalaya’ na ka bynta ki bar jylla kiba wan ban bylla sha ka jylla hynrei da kaba shu tap eit miaw ba ki dei tang ban shu pynrung kyrteng ha ka tnad Labour.
Ka seng ka buh ka jing kylli, hato u Conrad Kongkal Sangma kum u Myntri Rangbah ka Jylla um tip mo ba ia ka Inter-State Migrant Workmen (Regulation of Employment and Conditions of Service) Act, 1979 (Work Permit) ka dei ka aiñ kaba ladep ban pynjur bad pyntreikam naduh ka 28 tarik, Naitung, 2011.
Ka FKJGP ka sngew ba lada kat uta u khlieh nong synshar jong ka jylla um pat tip bha wat ia ki aiñ kiba la don lypa kum ka jaitbynriew bad kum ka jylla kumno ngin dang shaniah ha kum kitei ki nongialam kiba pyrshang ban ialam bakla ia ki paidbah tang namar ka jing kwah ban ailad bad ban iada iaki mynder kiba wan rung kyrthep sha kane ka jylla ka jong ngi na ka bynta ka jing myntoi ha ka saiñ pyrthei ban pynlong Vote Bank da ki mynder na ka bynta ban skhem ka shuki lajong, ong u kyrwoh ba la phah da u President u Bah Dundee C. Khongsit.
Kum ka seng ngi dang khmih lynti ba lyngba ka jingpynkup bor jong u paidbah ba kita kiba don ha ka bor synshar kin shakri ia ka jaitbynrtiew bad ia ka jylla hi baroh kawei phewse wat ia ki aiñ kiba la don lypa ruh ki dang pyrshang ban pynjah klep, sa katno tam lei ban pynurlong bad ban bud dien sha Nongbah Delhi ia kata ka Resolution ba la dep ban mynjur ha ha ïing dorbar thaw aiñ jong ka jylla kum ka Inner Line Permit (ILP), Ka jingpynrung ia ka ktien khasi ha ka Khyrnit Baphra jong ka riti synshar jong ka Ri India, ong u kyrwoh.
Shuh shuh halor ka jingong jong u Myntri Rangbah ka Jylla u Conrad Kongkal Sangma ba ki sengbhalang kim donhok ban talasi kot ia ki nong bylla bar jylla, ka FKJGP ka buh ka jingkylli hato kita ki Anti-Infiltration Check Gate kin shu long tang ki khyrdop lum khajna jongno re jongno bad kita ki Labour Inspectors ba la thung ha manla ki Block kin shu pynsyrwa kai ia ka pisa jong ka Sorkar da kaba shu shim tulop ei khlem da treikam satia, la kynthoh une u nongialam ka seng.
Ka Sorkar jylla ka dei ban tip bad sngewthuh shai ba kata ka jing register Case saw tylli pyrshah ia ki dkhot sengbhalang kan ym pyntieng pynsmiej satia hynrei ki dkhot jong ka FKJGP kin iai long ki nongpeit pyrman ban khanglad ia ki mynder ban rung laitluid sha kane ka jylla jong ngi bad ki kynroh jong ki along kin nym pynduh mynsiem satia hynrei ki long ki jingai mynsiem ia ki dkhot jong ki sengbhalang bad kine baroh ki pyni bad pynpaw shai ba kam don ka jingshimkhia na ka liang jong ka Sorkar ha kaba iadei bad ka ishu mynder, u la ong.
“Kyntang iawai ka FKJGP ka bthah ia baroh ki shnat treikam jong ka seng kiba don ha ka jylla hi baroh kawei ban bteng beit ia ka jing khynra mynder khnang ba kan long ka jingiada ia ka jaitbynriew na ka jing shah tyllep bad na ka bynta ka jing shngaiñ ki pateng ki ban sa wan,” la pynkut u kyrwoh.
