Shillong, Naitung, 11: Ki Pulit jong ka Umiam Police Station, Ribhoi District ha ka 5 tarik mynta u bnai ki la kem ia ki arngut ki dkhot jong ka Hynñiewtrep National Liberation Council (HNLC) ba la tip kyrteng kum u Kynsaijun Thabah ba ju khot sin Kynsai, 32 snem ka rta, uba sah ha Umlyngka, Kynton Block-II bad ia u Sanborlang Rapsang ba ju khot sin Sanbor, 38 snem ka rta uba sah ha Mawlai Umjajew, East Khasi Hills District.
Ha u kyrwoh ba la phah da u Superintendent of Police jong ka Ri-Bhoi District u Jagpal Singh Dhanoa, u la iathuh ba ha ka jingtohkit jong ki Pulit ia ka case ba la register ha Umiam Police Station hapoh ka Section 120B/506/384/511 IPC pule lang bad ka Section 10/13/17/18 UA (P), Act, saw ngut ki briew ki la shah kem ia kiba la tip kyrteng kum u Cyfrank Paul Pariat, Kitbok Mujai, Barnabas Lyngdoh bad u PWanpynshngai Dympep.
Ha ka jingtohkit, u Cyfrank Paul Pariat u la phla ba u la leit shah hikai pyntbit sha Bangladesh bad u Kynsaijun Thabah na ka bynta shi bnai, kata, ha shiteng jong u bnai Naitung, 2023 haduh Nailar, 2023 bad hadien ba la pyndep ia ka jingshah hikai pyntbit ki la wan phai noh sha la ing.
U SP u la iathuh ba ha ka 5 tarik, mynta u bnai ia u Kynsaijun la kem bad ha ka jingtohkit u la pha ba u dei u dkhot jong ka HNLC bad u la leit ban shah hikai pyntbit na ka bynta shi bnai bad u Cyfrank Pariat. Shuh shuh u la phla ruh ia ka kyrteng jong uwei uba don bynta lang ia uba la tip kyrteng kum u Sanborlang Rapsang uba la iarap ban kdew ia ka lynti iaid ban poi sha Bangladesh ha u snem baladep.
Shuh shuh u SP u la iathuh ba ki Pulit ki la kem ia u Sanborlang ha ka sngi Palei halor kitei ki kyndon ba la pynngat bad ka jingtohkit ka dang iaid shakhmat ban iohlum shuh shuh ia ki jingtip kiba bniah.
