Shillong, Naitung, 17: Ki nongshong shnong jong ka shnong Mawlai Mawroh ki la pyrshah ïa ka jingai jingmut jong ka Delimitation Commitee ïa ka Khasi Hills Autonomous District Council (KHADC) ban pynhap noh ïa ka shnong Mawlai Mawroh sha ka Jaïaw Constituency.
Ka Dorbar Shnong ka la lum ïa ka dorbar pyllun jong ki paidbah nongshong shnong ha ka step sngi Balang ban pan ïa ka jingpynsngew na ki paidbah nongshong shnong la ki kloi neem ban mynjur ïa ka jingai jingmut jong ka Delimitation Committee ka KHADC.
Ka Delimitation Committee ba la thung da ka KHADC ïa kaba la khlieh da u nongbishar ba la shongthait jong ka District Council Court u Bah Strawell Kharsyiemlieh kum u Chairman ka la aiti ïa ka kaiphod ha u Deputy Chief Executive Member (Dy.CEM) Bah Pynshngaiñ N. Syiem dang shen bad ïa kane kaiphod la rah ïatai ruh hapoh ka dorbar lyiur jong ka Iingdorbar Thawaiñ ka KHADC.
Dang shen u MDC jong ka Mawlai Constituency u Bah Teiborlang Pathaw u la pynpaw ba daleilei un ym shah ba ka shnong Mawlai Mawroh kan mih noh napoh ka Mawlai Constituency ban pynhap noh sha Jaiaw Constituency.
U la ong ruh ba ka kaiphod jong ka Delimitation Committee ka dang dei tang ka jingai jingmut bad ia ka rai kaba khatduh yn sa shim hapoh ka dorbar jong ka KHADC.
Ïa ka kaiphod la mynjur da ka Ingdorbar ban phah shwa sha ka Select Committee ba la khlieh da u Dy. CEM na ka bynta ban ïathir ïatai sani hadien ba ki dkhot ka Liang Pyrshah ki la kam ba ka Delimitation Committee ka la aiti dierpor ïa ka kaiphod bad ba ki dkhot jong ka Iingdorbar kim shym la ïohlad ban pule bad ban khmih bniah.
Ha ka jingïakren bad ki lad pathai khubor, ki nongshnong shnong ki la pynpaw ba kim treh ban leit ïasnoh sha ka Jaïaw Constituency bad ong ruh ba kum ki nongshong shnong ka shnong Mawlai ki kwah ban ïai neh beit hapoh ka Mawlai Constituency.
U Rangbah Shnong jong ka Mawlai Mawroh u Bah Harbour R. Lyngdoh Nongpyiur u la ong kum ka shnong ka pyrshah jur ïa ka jingai jingmut jong ka Delimitation Commitee bad ïathuh ba ha kine ki khyndiat sngi, ka Dorbar Shnong kan sa leit ban aiti da ka jingthoh ha u Chairman jong ka Delimitation Committee ba la thung da ka KHADC ban pynpaw ïa ka jingbymmon jong ki nongshnong shnong ka shnong Mawlai Mawroh ban shah pynïasnoh bad ka Jaïaw Constituency hynrei ban pynneh beit hapoh ka Mawlai Constituency.
U Bah Harbour u la ong ba ka Dorbar Shnong kan sa ai jingmut ruh ïa ka Delimitation Commitee ban phiah noh ïa ka Mawlai ar bynta kata Mawlai A bad Mawlai B lada i donkam namarba ka Mawlai Constituency ka dei kaba wan nyngkong eh ha ka jingheh jong ka Constituency bad ka jingbun jong ki nongthep vote hapoh ka jylla baroh kawei.
