Shillong, Naitung, 17: Ka jingbym pdiang jong ki bor pynïaid ka State Bank of India, Malki Branch ïa ka jingshon kti jong ki dkhot ka Board of Trustee ka Blind Lead Trust kaba dei ka kynhun jong ki briew kiba don jingduna ha ka bor ïohi jong ki khmat ka la pynlong ïa ki nongïalam jong kane ka kynhun ban khang noh ïa ka Bank Account hapoh kane ka Bank.
Ha ka jingïakren bad ki lad pathai khubor, u Co-Founder bad Mananging Director jong ka Blind Lead Trust u Bah Jitendra Dkhar, u la ong, “ha ka jingïalang jong ka Board of Trustee ngi la shim ïa ka rai ban khang noh ïa ka Bank Account ha ka SBI Malki Branch namarba ka Bank kim pdiang ïa kaba shu shon kti. Ngi dei ki briew ki bym lah ban ïohi bad ngi thoh dak da ki Braile Alphabet tangba ki (SBI Bank) kwah ba ngin soi da u khulom.”
“Ngi la leit bunsien sha ka Bank ban ïakren ïa u Branch Manager bad Service Mananger hynrei kim pynsngap satia ïa ka jingkyrpad jong ka seng. Ki paralok jong nga ruh ki ïakynduh jingeh khamtam ha ki thaiñ nongkyndong wat tang ban plie ïa ka Bank Account ruh kim shah, ka ATM Card ruh kim ai, ki (bor ba dei peit) phah plie beit da ka Joint Bank Account,” la ong u Bah Dkhar.
U la ïathuh ruh ba ki bor pynïaid jong ka Bank ki kwah beit ban wanrah sakhi da ki briew kiba biang ki dkhotmet.
Katkum ka jingong jong u, ka jingbym pdiang jong ka Bank ban shu shon kti ha ka jaka ban shu soi, ka long ka jingpynkheiñ ïa ka Rights of Persons with Disabilities Act, 2016.
“Katkum ka jingtip jong ngi ka Reserve Bank of India (RBI) ruh ka la pynmih jingthoh (Circular) ba ym lah ban kyntait tang na ka bynta ba ngi shu shon da ka kti. Kaba phylla pat ha kane ka jylla jong ngi, ki (nongtrei ha ki Bank) duna bha ïa ka jingtip halor kane ha kaba ngi hap ban ïamai bad ïania. Kum ka seng ngi la rai ba ïa kane ngi kwah ban pynsngew sha ki paidbah bad sha ki nongtrei Bank ba kin tip shaphang kane,” u la ong bad bynrap, “ïa ki kyndon kiba la buh da ka Sorkar, ki nongtrei kim buh bad ngim tip na kaei ka daw.”
Une u Managing Director jong ka Blind Lead Trust u la buh jingkylli ïa u Myntri ka tnat Social Welfare ka Sorkar Jylla u Bah Paul Lyngdoh da kaba ong, “kiei ki kyndon ba phi buh na ka bynta jong ngi kiba duna ka bor ïohi namarba lada ïakren ïa ki Accessibility Guidlines ki ïapher na ki Hearing Impaired bad ki Visually Impaired. Nga kwah ruh ban pynshai halor kane.”
U la ïathuh ruh ba u ladep ban phah ïa ka jingujor sha ka Commisioner for Persons With Disability lyngba ka email hynrei haduh mynta um ïoh jubab satia.
“Ka jingbym shimkhia ka dei ka daw kaba la pynlong ïa ngi ban ïakynduh jingeh katne katne. Ngin sa phah ïa ka jingujor sha ka Reserve Bank of India (RBI) kaba don ha Meghalaya. Lada ka Commisioner for Persons With Disability kam shimkhia ngin sa shim da ka lynti kaba kham tyngeh ban leit tied wat ïa ka jingkhang kaba kham shalor,” la ong shuh shuh u Bah Dkhar.
Shuh shuh u la kyrpad ïa ki Ophisar bad ïa u Myntri ka tnat Social Welfare ban khmih bniah ïa ki aiñ khnang ba ki briew kiba don jingduna ha ka bor ïohi jong ki khmat kin ym ïakynduh jingeh.
