Shillong, Naitung, 18: Ka la mih ka jingïania kaba jur hapdeng ki riewpaidbah namar ka jingpynibor jong ki shipai Border Security Force kiba ap pahara ha ka shnong Muktapur, ka shnong kaba don ha khappud jong ka Meghalaya, India bad ka ri Bangladesh.
Kane ka la jia ha ka sngi Palei ha ka por kumba 10:45 baje baje mynstep ha kaba kawei ka kali ba don ïa u nombar ML-11-6112 kaba dei jong u Bah P. Syndai katba ka dang wan phai na iing jong ki bahaiing, ki shipai BSF ki la pynsangeh hapdeng surok ïa kane ka kali bad knieh ruh wat ïa u shabi jong ka kali.
Ki paidbah nongshong shnong kiba ïohi ïa kane ka jingleh donbor jong ki shipai BSF ki la tur ban ïania bad ki shipai.
Da ka jingtuklar jong u uwei u heh ki shipai BSF la lah ban tem ïa kane ka jingïania bad hadien kata ki shipai BSF ki la pyllait noh ïa ka kali.
