Shillong, Naitung 18: Ka Hynñiewtrep Achik National Movement (HANM) ha ka sngi Palei ka la leit ban ai da ka jingthoh sha ka Director General of Police ka (DGP) ka jylla ka Kong Idashisha Nongrang halor ka jingïoh ujor ba ka don ka jingrung tuh jong ki mynder na ka ri Bangladesh sha India lyngba ka thaiñ khappud jong ka shnong Danngar bad ka shnong Balat.
Ha ka dorkhas ka seng ka la kdew ba ki don ki briew kiba don kti ban pynrung ïa ki khar Bangladesh da kaba dawa pisa haduh T.10,000 marwei ban pynrung tuh sha India.
Ka seng ka la dawa ruh na ka DGP ba kan khot hajir ïa ki shipai BSF kiba peit ïa ki khappud bad ka Bangladesh ban pan jingshai na ki halor kane ka jingwan kiew ki khar Bangladesh da ka jingïatreilang ki riew shim kabu.
Haba kren ha ki lad pathai khubor hadien ka jingïakynduh ïa ka DGP u President ka seng u Bah Lamphrang Kharbani u la ong ba ka jingïakren ka long kaba seisoh ha kaba ka DGP ka la ai ka jingkular ba kan leh ïa kaba donkam.
Ha kane ka jingïakynduh la kyntu ruh ïa ka DGP ba kan pynkloi ïa ka jingthung kam ha ka tnad Pulit bad ban pyrkhing ia ka jingwan rung u drok shapoh ka Jylla Meghalaya.
