Shillong, Naitung, 30: Ka Shillong Traffic Police ha ka Sngi Baar ka la pynmih ïa ka jingpyntip ba la pyrkhing ïa ka jingïaid ki kali heh naduh ka por 1:00 baje noh sngi ha ka thaiñ Polo, Shillong ha ka 2 tarik, Nailar, 2024, ka sngi ban pynlong ïa ka lympung ïalehkai phutbol Durand Cup 2024 ha madan JN Complex, Shillong.
Katkum ka jingpyntip jong u Superintendent of Police (Traffic) u K. Prasad, yn ym shah ïaid satia ïa ki kali naduh Lum Jingshai lyngba ka surok kaba poi ha ktem sah ki CRPF ha Polo bad yn ym shah ïa ki kali ban ïaid lyngba ka surok na Lum Jingshai sha Forest Colony hynrei ki kali kin hap ban ïaid lyngba ka surok shnong Lawmali bad Iew Polo.
Yn ym shah ban pynieng kali ha shilynter ka surok ha ka thaiñ Polo naduh ka por 11:00 baje mynstep tad haduh ban da kut ka jingïalehkai phutbol. Yn ym shah ïa ki kali ban pynieng harud surok naduh Golf Club ter ter shaduh CRPF Camp. Yn ym shah ïaid ruh ïa ki kali heh ha ka thaiñ Polo.
Ka tnat Pulit ka kyntu ruh ïa ki paidbah ba kin shong da ki Car Pool lane ki Taksi kamai lada ki thmu ban leit sakhi ïa ka jingïalehkai phutbol ha madan JN Complex.
