Shillong, Naitung, 31: Ka Khasi Students Union (KSU) Mawlai Circle kaba la bteng ban khynra Work Permit ïa ki nongbylla bar jylla kiba trei ha ki shnong bapher bapher kiba dang hap hapoh ka jylli jong ka shnong Mawlai, ha ka sngi Balang ka la pynher krad kumba 21 ngut ki nongtrei bar jylla ïa kiba ka seng ka la kynnoh ba ki dei ki bym don satia ïa ki kot ki sla kiba biang.
Ka jingbteng jong ka KSU ban khynra ïa ki nongbylla bar jylla ka long hadien ba ka seng ryngkat bad kiwei pat ki kynhun sengbhalang hapoh kane ka jylla dang shen ki la shim ïa ka rai ban pyntreikam hi noh ïa ka Meghalaya Residents Safety and Security Act (MRSSA) ha kane ka jylla Meghalaya bad ban dawa ruh ïa ka Sorkar India ba kan ai jingmynjur noh ban pyntreikam ïa ka Inner Line Permit (ILP) ha kane ka jylla.
Ïa ki video bad ki dur ba la phah da u Information Secretary ka KSU Sengkmie u samla Pynshaiborlang Rani sha ki lad pathai khubor, la sakhi ba ki bar jylla ki la lum lut ïa ki tiar ki tar bad leit phai noh sha la ka jong ka jylla.
