Shillong, Nailar 04: Ki nongrep jong ka shnong Umladoh, Ribhoi District ki la pynrem jur bad bitar ia ka jingpynjulor bad mait naphang ia ki jingthung jingtep jong ki san tylli ki longing da ka Khasi Hills Autonomous District Council (KHADC) lyngba ka Lailad Beat House ha ka sngi Saijaiñ.
Ki nongshong shnong ka Umladoh ki la ïathuh ba ka District Council ka la leh ïa kane, khlem da pyntip sha ka shnong ne wat sha ki trai jong ki jingthung jingtep kiba ki la rep shitom baroh saw aiom.
Ki nongshong shnong ki la ïathuh ba ki marrep kiba la shah pynjulor ki long naduh ka kait, u Sohtrun, u Kwai, Soh Niamtra bad kiwei kiwei de ki jingthung bad ki longing ba la shah ktah ha kane ka jingshah pynjot ki jingthung ki long ïa ka longiing jong ka Kong Prin Umsong, ka Kong Brina Sylliang, ka Kong Slis Lyngdoh, ka Kong Ormilis Lapang bad ka Kong Phiarnes Sylliang.
Kine san tylli ki longiing kiba la shah ktah ki la pynpaw ïa ka jingsngewkhia kaba jur halor kine ki kam thombor jong ka KHADC ban pynjot ïa ki jingthung jingtep bad ki la pynrem jur ruh ïa kane da kaba ong ba ka dei ka ‘jingleh riewkhlaw’ ban shu pynjot ïa ki jingthung khlem da pyntip sha ka bor shnong bad sha ki trai nongrep.
U Rangbah Shnong jong ka shnong Umladoh Bah Wet Syngkli, u la pynrem jur ïa kane ka jingleh jong ka KHADC ban pynjot ïa ki jingthung jingtep jong ki nongrep bad ong ruh ba kum ka bor shnong ruh kam ïoh jingtip satia. Ha ka jingshisha ki nongtrei jong ka KHADC ki la dei ban pyntip sha ka shnong shwa ban leh ïa kane ka kam.
U la ong ruh ba ka shnong Umladoh ka dawa ïa ki bor bahalor ka Sorkar ba ka dei ban tuklar halor kine ki kam thombor ka KHADC pyrshah ïa ki nongrep bad kum ki nongrep ki dei ban ïoh ïa la ka hok halor kane ka kam kaba ki la wan pynjot julor ïa ki jingthung jingtep ki nongrep.
U Bah Syngkli u la batai ruh ha ka 1 tarik, Nailar, 2024 u ophisar jong ka KHADC u la pyntip sha ki nongrep ba ki dei ban pynkynriah lut ïa ki jingthung jingtep na ka jaka rep hynrei tang hapoh shi sngi, kata ha ka 3 tarik, Nailar 2024 la wan ban mait naphang ïa ki jingthung jingtep khlem da burom ïa ki nongrep kiba la im jakpoh na ka rep ka riang.
