Shillong, Nailar, 07: Ka tnat Textile ka Sorkar Jylla ha ka sngi Balang ka la rakhe ïa ka National Handloom Day 2024 ha Soso Tham Auditorium, Shillong ha ryngkat ka jingsakhi lang jong u Myntri ka tnat Textile u Bah Paul Lyngdoh uba la long kum u kongsan bad ka Dr. Anna Louise Meynell kaba dei ka International Textiles Expert na Scotland kaba la long kum ka kongsan ba kyrpang, u Commissioner & Secretary jong ka tnat Arts & Culture u Bah FR Kharkongor, ka Padmashree Kong Patricia Mukhim bad ki heh sorkar.
Haba kren ha kane ka sngi u Bah Paul Lyngdoh u la ong ba ka long kaba donkam ban don ïa ka jingkitkhlieh lang na baroh ki nongshim bynta ha kaba pynbha ïa ka sap ba kyrpang jong ki nongthaiñ jaiñ jong ka jylla da kaba pynshlur ïa ki nongthaiñ jaiñ jong ka pateng kaba lai kiba don bynta ban dang bteng ïa ka dustur tynrai jong ki.
U Bah Lyngdoh u la ïathuh ba ka pyrthei ka la ai jingïaroh ïa ki tiar shna kti ba la pynmih na kane ka jylla Meghalaya bad u la kyntu ïa ki nongthaiñ jaiñ ba kin thaw thymmai bad ban pynïaid iew ïa ki jaiñ sha ki iew ki hat jong ka pyrthei.
“Mynta ka sngi ngi sngewsarong ban pyni sha ka pyrthei baroh kawei ba ki jaiñ bad ki mar jong ngi ki don ha Ri Bhoi District bad ha kiwei kiwei ki bynta jong ka jylla,” u la ong.
U la pynpaw ïa ka jingsngewnguh ïa baroh ki nongshim bynta kiba don bynta ha kane ka jingïaid lynti, ka jingriewspah jong ka jylla. “Ngi kwah ban pyndonkam hok ïa ka jaiñ jong ngi, ym tang ha kiwei pat ki bynta jong ka ri India hynrei ha ka pyrthei baroh kawei,” la bynrap u Bah Lyngdoh.
Ha kane ka sngi la pyllait paidbah ïa ka Meghalaya Textile Directory cum Textiles Atlas bad ïa ka e-portal jong ka tnad Textile, nalor ka Fashion Show da ki samla pule jong ka KL Bajoria College bad u Designer u Bah Daniel Syiem.
