Shillong, Nailar, 07: Ka Khasi Students Union (KSU) West Jaiñtia Hills District Unit ryngkat bad ki dkhot jong ka shnat treikam ka War Jaiñtia Circle ha ka sngi Balang ki la hiar jurip sha ki bynta ki thaiñ Dawki- Amlympiang bad kiwei de ki jaka khappud bad ka Ri Bangladesh ban ïa kynduh bad ki nongïalam jong ka shnong Dawki bad Amlympiang ban ïathir halor ki jinglong jingman ha shi lynter ka khappud khamtam halor ka jingjia ki kam pohiing ha ka ri Bangladesh.
Na ka liang jong ka shnong Dawki bad ka Seng ki la shim ïa ka rai ban long kiba la khreh ban ïakhun lang ïa kino kino ki jingïaleh lada ka long ha kano kano ka bynta ruh lada ki mynder na ka ri Bangladesh ki thmu ban wan tur be-aiñ shapoh u pud u sam jong ka ri.
Ha kane ka sngi, ki nongïalam jong ka seng ki la ïa kynduh ruh ïa u Officer Incharge jong ka Infiltration Dawki bad la ïoh jingtip ba ki mynder na ka ri Bangladesh ki pyrshang hi ban rung sha Meghalaya hynrei kim shym la ïohlad satia namarba ka ophis Migration jong ka Bangladesh ka la khang khyrdep.
Ki nongïalam ka seng ki la ïoh ruh ban jurip ïa katto katne tylli ki jaka kiba ki mynder na ka ri Bangladesh ki ju pyndonkam ban rung tuh sha ka Jylla Meghalaya bad kawei na kine ki jaka ka dei ha ka shnong Amlympiang ha kaba bunsien ki mynder na ka ri Bangladesh ki ïohlad bha ban rung shapoh ka Jylla Meghalaya namarba la pyntip ba ki shipai BSF kim don satia ha kane ka jaka ban peit pyrman.
Ki nongïalam ka KSU ki la ïohlad ban ïakynduh ruh ïa ki nongïalam shnong jong ka shnong Bakur bad ka shnon gDawki bad la ïathuh ba haduh ka sngi Baar na ka liang ki mynder na ka ri Bangladesh ki la wan tur da ki lieng kynda ban khlong ïa ki maw na ka ‘No Mans Land’ ( Zero-point) bad na ka liang ka Dorbar Shnong ka kwah dik dik ban pynbeit noh ïa u pud sam uba biang namarba haduh mynta ka Dorbar Shnong Dawki ka kongnguh bad ïa trei lang bad ki bor kiba dei peit hynrei ki mynder na ka ri Bangladesh ki ju wan klong jubor ïa ki maw da kaba tam pud na ka por sha ka por.
