Shillong, Nailar 16: Ka Synjuk Mattithaw, Riti Academy ka la pynlong ïa ka rakhe ainam khusnam jingtbit ïa ki san ngut ki khlur ka jylla kiba la tyngshaiñ ha la ki kam ba ki trei shitrhem hynrei kiba khlem pat ïoh ka jingithuh kaba shongnia katkum ki kam ba radbah jong ki. Kane ka rong ka taw ai khusnam ka la long ha paki dulan jong u Lat ka jylla, Chandrashekar H Vijayashankar u ba la pynkup burom artat ïa ki riewtbit ka kynsai kiïba kynthup ïa u Bah Mervin Jude Mukhim kum u riewtbit ha ka rwai ka siaw ka sawangka bad durim, Kong Ibankyntiew Mawrie ha ka kam pathai khubor, Bah Marco Babit Mitri ha ka thoh ka tar bad ka tihsani, Alicia Pyngrope ha ka rwai ka siaw bad Shanborlang Kharbudon ha ka thohdur.
U Kongsan u la ïaroh ïa ka Riti Academy bad kyntu ïa ki tnat sorkar ban pynshlur bad kyntiew ïa ki kam ba kynsai jong ki samla khamtam ha ka mattithaw. Haba u la ïaroh ïa ka jylla u Vijayashankar u kynthoh mardor, “Ka bneng ka doh hangne ha jylla ha ba kiei kiei baroh ki long ki ba miatdur,’ da kaba u bynrap artat ba dei ban kyrshan deipor ïa kum kine ki jingpyrshang bad kyntu ruh ba ym don kaei kaei kaba ym lah long lada ïaineh bad durïap ha la ka kam.
Ki khusnam la ainam ha ka kyrteng jong ka Crystal Gayle Kharnaior, ka ba la khlad noh ha u snem 2017. Ka Crystal ka la long ka puron ba tbit bad pnah bha ha ki sawangka bad ha ka shad kumba ka paw ha ka drama Ding ka Jingieit bad ba ka la shah pynkup burom ha ka tamasa sawangka ba la jer 1st International Indigenous Theater Festival in Dhaka, Bangladesh ha u snem 2015.
Kumjuh kawei pat ka khusnam la ainam ha ka kyrteng jong u Prithpal Singh Sehdave, ba ju sin ieit u Ladi, u ba la kha ha u snem 1955 ha Shillong bad u la khlad ha u snem 2023. U Ladi u dei u barikor shtah dur u ba tbit palat liam ha kaba ki kam jong u la tip bad ïoh ka nam ha satlak pyrthei. U Ladi u la ïoh byllai ki khusnam na kylleng ka pyrthei, hynrei u long u ba sngewrit bad shitrhem ha la ka kam shtah dur. Sa kawei pat ka khusnam la ainam ha ka kyrteng jong u Bah Sumar Sing Sawian u ba long u akhia rangbah ha ka thoh ka tar, ka pathai khubor bad ba tip sani shaphang la ka deiriti. U Bah Sumar u dei u radbah u ba la prat lynti ïa ka kiew ehrngiew sha Lum Sohpetbneng kaba la sdang naduh u snem 2000 khlem pud haduh mynta mynne. U la ïoh nam da ka Khusnam Tirot Sing na jylla ha u snem 2017 na ka bynta ki kam bakhraw ba u la noh synñiang.
Ka don ruh ka khusnam ha ka kyrteng jong u Bah Rana Kharkongor u kaitor bad myllung u ba la pratlynti ha ka liang ka rwai ka siaw ka put ka tem khamtam ki jingrwai ieit ri bad ieit mariang. U Bah Rana ruh u la ïoh ka khusnam Tirot Sing na jylla ha u snem 2006. La ainam ka khusnam ha ka kyrteng jong u Ma S QUOTIENT SUMER, u ba dei uwei pat u akhia radbah na Jaiñtia u ba la synñiang radbah ha ka mattithaw, ka pathai khubor, ha ka thoh ka tar bad u ba la long teng ruh u dkhot rangbah jong ka Sahitya Akademi. U Ma Quotiennt u la ïoh ïa ka khusnam Tirot Sing ha u snem 1981 na ka bynta ki synñiang ba radbah ha ka imlang sahlang.
Ki nongjop jong ki khusnam ki kynthup ïa u Bah Merlvin Jude Mukhim, Prof. Marco Babit Mitri, Ibankyntiew Mawrie, Alicia Pyngrope, bad Shanborlang Kharbudon na ka bynta ki jingtbit ba kynsai jongki ha la ki kam lajong ba ki trei bad pyntbit. U Khlieh rangbah jong ka synjuk Riti Academy u la pynpaw ka jingkmen bakhraw na ka bynta kine ki khlur ba tyngshaiñ shynna ha la ka jylla, ki ba khlem pat ïoh ka jingithuh ba paka katkum ki kam ba radbah jongki. U Bah Raphael Warjri u la kren mardor ba ka imlang sanglang ka donkam ban sien syntiew ïa ki samla bad rangbah ki ba la durïap ban pynsahnam ïa la ka jylla da ki kam bakhraw ba ki la synñiang.
