Shillong, Nailar, 17: Ka Dorbar Shnong Lumdiengjri ha ka step sngi Saitjaiñ ka la kyndang bad pynher krad ïa ki phra ngut ki bar jylla kiba wan na ka jylla Uttar Pradesh kiba dei ki Muslim kiba la leit rieh tngen ha Masjid ha Lumdiengjri hadien ba ki la shah kyndang ha ka Dorbar Shnong Mawbah ha kine ki khyndiat sngi.
Ha ka jingtohkit, kine ki phra ngut ki la phla ba ki la leit sah shwa ha nongbah Tura bad ha ka 10 tarik Nailar, 2024 ki la wan poi ha ka shnong Mawbah bad sah ha kane ka shnong mynta la jan shitaiew kynthih.
Ha ka jingïakren bad u Rangbah Shnong jong ka Dorbar Shnong Lumdiengjri u Bah Willyson Ïangngap u la ong ba kine ki dei ki briew kiba la shah beh shuwa na ka shnong Mawbah, Upper Mawprem. Ka Dorbar Shnong Lumdiengjri bad ki Sengbalang kiba la ïoh ïa ka jingtip kaba bniah, ha kane ka step, ki la leit rung ha Masjid ryngkat ka jingsynran lang jong ki Pulit ha kaba la lap ba kine ki phra ngut ki rieh tngen ha kane ka jaka.
Na ka liang jong ka Dorbar Shnong ki la phah ban pynshisha ïa ki kot ki sla hynrei kine ki bar jyll ki don tang ïa ka Aadhaar Card.
Da ka jingwan poi jong ki Pulit ka Anti-Infiltration Directorate kiba la pynlong ïa ka jingtohkit kaba bniah ïa kine ki phra ngut ki bar jylla la phah ba kin leit phai noh sha ka jylla ba ki wan.
