Shillong, Nailar, 17: Ka Dorbar Shnong Nongsohphoh, Upper Mawprem bad ka Dorbar Shnong Mawbah ryngkat ka jingïatreilang bad ka Federation of Khasi Jaiñtia and Garo Peoples (FKJGP) Mawprem Circle lem bad ka Khasi Students Union (KSU) Mawprem Circle ki la thaw da ka Joint Action Committee ha ka jingïalang kaba la long ha ka 8 tarik mynta u bnai ban leit khynra ha manla ki thliew ing khnang ban lap ïa ki mynder kiba wan sah beaiñ hapoh u pud u sam jong ka Dorbar Shnong Mawbah bad Nongsohphoh.
Ha u kyrwoh ba la phah sha ki lad pathai khubor da u Rangbah Shnong ka Nongsohphoh u Bah Johny Kharmawlong bad u Secretary u Bah Hardy Ryntathiang ryngkat bad ki video ba ki la ring hi, ki la pyntip, haba la pyntreikam ïa kane ka rai, ha ka sngi Saitjaiñ kine ki ar tylli ki Dorbar Shnong ryngkat ka jingsynran lang jong ka FKJGP bad KSU Mawprem Circle ki la pynlong ïa ka jingkhynra naduh ka por 6:00 baje mynstep ha kaba la lap ba ki don bun ngut ki bar jylla ki bym don ïa ki kot ki sla kiba biang bad don ruh kiba ïoh ïa ka EPIC da kaba shu ïoh ïa ka No Objection Certificate na ki Self Styled Headmen ki bym shym la ïoh jingithuh na ka ophis jong u Syiem ka Hima Mylliem.
Hapdeng ka jingkhynra, ki nongkitkam jong kine ki ar tylli ki dorbar shnong ki la ïoh kem ruh ïa ki nongdie bad ïa ki nongdih drugs.
“Ngi maham tyngeh ïa ki trai ing kiba aiwai nangne shakhmat ngi ki ar dorbar ngi la shim rai ban pyrkhing,” la ong u Rangbah Shnong ka Nongsohphoh.
“Ngi phah ruh ïa u kyrwoh sha u Chief Executive Officer (CEO) jong ka Shillong Cantonment Board (SCB) lada um lah ban pynkhuid ïa kane ka jaka bad lada um lah ban kyndang ïa kine ki briew, ngi ki ar dorbar shnong ryngkat bad ki sengbhalang ngin leh la ka jong ka kamram,” u la ong.
“Ngim lah ban peit lada ka aiñ kam treikam bad ngin hap ban ïa mih paidbah ban pyntreikam da ka aiñ jong ka shnong,” u la bynrap.
U la phah ruh ïa u kyrwoh sha ka tnat Pulit ba ka dei ban peitngor ïa ka jingjyllei jong ki briew kiba ju mlien ban khaii tuh ïa u drok bad kumjuh ruh ïa ki nongdih drok.
Ka jingkhynra kan ym kut tang mynta ka sngi hynrei kan dang ïai bteng nangne shakhmat, u la ong.
Shuh shuh u Secretary jong ka shnong u Bah Hardy Ryntathiang u la ïathuh ruh ba ka Joint Action Committee ka la lap ba ki don ki Self Styled Headmen kiba thaw ïa ka Society kaba la tip kum ka Lower Palton Bazar Village Council (LPBVC).
“Ngim don jingithuh ïa kine, hynrei kumba ngi tip ma ngi, ka Lower Palton Bazar ka dei kaba hap hapoh u pud u sam jong ka Dorbar Shnong. Kumno kiba nabar ki ïoh long Rangbah Shnong hangne? u la buh jingkylli.
