Shillong, Naitung, 21:Ki ophis treikam jong u Syiem Hima Jirang, Ri Bhoi District kiba don ha Rani Jirang bad ha ïew Mawroh ha khappud ka jylla Assam ki la kylla iingjot namarba ka hima kam shym la pyntreikam shuh la bun bun snem bad wat ki Sign Board ruh kim don shuh mynta.
Ha ka jingshisha ïa kine ki ophis ka hima ka la dei ban pyntreikam namarba ki long kum ki mawpud ban ïada na ka jingklun jaka da ka Assam, hynrei la shu iehnoh khlem don shuh ki nongpeit nongsumar bad ki kylla iingjah naduh ka jingkhlad noh jong u Syiem Tymmen u Pa’iem Lokendro Syiem ha u snem u 2005.
Hadien ba la plie ïa ka Rani Police Out Post bad ïa ka Infiltration Check Post ha iew Mawroh ki Pulit ki la pynlong jaka sah ïa ki katto katne ha ki ophis jong ka Hima wat lada ki la jot.
Ka jingïakren ka la don na ka liang jong ki bor hima ban shna pynbha ïa ki ophis ka Hima ha Rani bad ha ïiew Mawroh hynrei ym lah ban tip kaei ka daw ba kim lah ban pynbha ïa kine ki ophis kiba long kum ki mawpud jong ka hima bad ka Assam.
Kine ki ophis ha ka por ba dang synshar da u Pa’iem Lokendro Syiem ki ju pyntreikam ban bishar ïa ki kam hima sima ïa ki paidbah ka thaiñ bad ka la ïarap shibun ïa ki paidbah ha ka thain ban pyndep ïa ki kam kum ha ka sngi ïew Rani bad iew ïawroh bad ki paidbah ruh ki sngewshngaiñ ruh ha ka leit ka wan na ka jingdon kine ki ophis khamtam ki para Khasi kiba leit donkam sha Assam na ki shnong ba jngai bad ki ju pynlong ruh kum ka jaka shongthait namarba ki don ha khappud Assam.
Ha Rani Jirang donbok ka don ka Police Out post bad ka ophis jong ka State Forest bad ka Beat Office jong ka Khasi Hills Autonomous District Council (KHADC) katba ha ïew Mawroh ka don ka Infiltration Checkpost bad ka ophis jong ka tnat Forest ki dang mynta.
Ki bor hima ki ladei ban shna pynbha noh khlam kloi ïa kine ki ophis na bynta ka jingbha ka miat ki paidbah bad khamtam ban ïada na ka jingkyntur pud jong ka Sorkar Assam sha ki shnong khappud ka jylla Meghalaya.
