Shillong, Nailar, 22: U President ka Meghalaya Pradesh Congress Committee (MPCC) u Bah Vincent H Pala ha ka sngi Palei u la kynnoh ba u Symbud Myntri Rangbah ka jylla u Bah Sniawbhalang Dhar uba dei ruh u National General Secretary jong ka National Peoples Party u dei u “nongaiktien ” jong ka Rashtriya Swayamsevak Sangh (RSS) bad ka Bharatiya Janata Party (BJP).
U Bah Pala u la kynthoh tyngeh halor ka jingkren jong u Bah Dhar ba shen ka seng Congress kan sa duh sa dam na ka jylla Meghalaya hadien ka jingpynïasoh dang shen jong ki lai ngut ki MLA ba kynthup u Bah Gabriel Wahlang na Nongstoin, u Dr Celestine Lyngdoh na Umsning bad u Bah Charles Marngar na Mawhati sha ka NPP.
“U Bah Sniawbhalang Dhar u dei u nongaiktien jong ka RSS. Ka RSS lane BJP haba ki don hangno hangno ba ki don, ka sur jong ki ka dei Congress Mukt. Kumta u Bah Sniawbhalang Dhar u hap ban pynmih sur lym kumta ki tip lut ïa ki kam beaiñ naduh u drok, u dewiong haduh kino kino ki kam baroh ba la leh da u Bah Sniawbhalang Dhar bad ka Kompeni,” ong u Bah Pala haba ïakren bad ki lad pathai khubor.
Haba kynnoh ba u Bah Dhar u don hapoh ka jingpeit shin jong ka CBI, une u heh ka Congress u la ong, “nga la long u MP, nga tip bha. Ki ju wan sha nga bad pan jingmut, jingtip. Baroh ki File jong ki ki don ha ka miej jong ki. Kan poi ka por bad ngin sa peit mano ba dei u Bah Sniawbhalang. Ka histori kan sa ïathuh mano ba dei u Bah Pala bad uei u Bah Sniawbhalang?
Da kaba kdew ïa ka jingshah kem jong u Arwind Kejriwal bad kiwei kiwei ki nongïalam saiñpyrthei ba kynthup ïa ki myntri rangbah barim, u Bah Pala u la ong, “Ki rekod kiba ki la buh ha kawei ka sngi kin sa ngat hi ha ka jingeh.”
“Mynta ki hap ban kren da ka sur jong ka BJP lym kumta kin shah pynkut ha ka BJP kumta ka sur jong u Bah Sniawbhalang ka dei shispah na ka shispah ka sur jong ka BJP, ka sur jong ka RSS. Ki paidbah ka Meghalaya ki dei ban tip u dei uei. U la shah pynpaw pyrthei da ka jingkren jong u ba u la shah pyndonkam ha ka BJP, u la shah pyndonkam ha ka RSS,” la kynnoh shuh shuh u Bah Pala.
Halor ka jingkren jong u Bah Dhar ba ka NPP kan pdiang sngewbha ïa u Bah Pala ban ïasoh bad ka NPP ha kano kano ka por, u President ka Congress u la jubab da kaba ong “Nga tharai ba u Bah Pala u kham riewspah ban ïa ka NPP.”
