Shillong, Nailar 24: Na ka bynta ka jingpynkhreh ïa ka semi final jong ka lympung ïalehkai Durand Cup 2024, ka Shillong Traffic Police (STP) ka la pyrkhing ïa ka rukom ïaid ki kali ha ki katto katne ki jaka na ka bynta ka jingpynlong ïa kane ka jingialehkai kaba heh duh ha ka ri ka ban sa long hapdeng ka Shillong Lajong FC pyrshah ïa ka North East United FC ha ka 26 tarik mynta u bnai ha J.N. Stadium, Polo ha ka por 5:30 janmiet.
Ka STP ka la ong, khnang ban pynsuk ïa ka jingïaid beit ïaid ryntih ki kali bad ki paidbah la pynmih ïa ki jingpyrkhing ïa ka jingïaid ki kali naduh ka por 2:00 baje mynsngi tad haduh ban da kut ka jingïalehkai.
Ka jingpynbeit ïa ka rukom ïaid ki kali ka long ba ha ki katto katne ki jaka ha sawdong jong ka Polo, kynthup ïa ka Lumjingshai Junction, 4 Furlong Junction, Polo Market bad Lawmali Junction bad ïa kine yn ym shah ïaid kali naduh ka por 2 baje bad 3 baje mynsngi.
Ki kali kiba leit sha kitei ki jaka kiba la mana, yn bthah ba kin hap ban ïaid noh sha ka surok ban leit sha Lawmali, Jaïaw bad Jingthangbriew.
Yn ym shah ïa ki kali heh ban rung sha ka thaiñ Polo naduh ka por 2 baje mynsngi.
Yn ym shah ban pynïeng kali ha sawdong jong ka thaiñ Polo naduh ka por 11 baje mynstep.
La pynshlur ïa ki paidbah ba kin ïashong lang ha ki kali ne taksi khnang ba kan pynduna ïa ka jingdheng kali ha katei ka sngi.
La ong ruh ba la pyllait ïa ki kali kiba hab ha ka kyrdan ‘Emergency Service’ bad kito kiba kit ïa ki briew kiba pang ba kitei ki jingpyrkhing.
Ka STP ka la kyntu ïa ki paidbah ba kin kiar ban leit sha ka thaiñ Polo lada kim donkam ban leit naduh ka por 2 baje mynsngi haduh ban da kut ka jingïalehkai.
Ka Shillong Traffic ka la kyntu ruh ïa ki nongkyrshan kiba leit sha J.N. Complex ban sakhi ïa ka jingïalehkai Football ba kin leit noh dang kloi khnang ba kan lait na kano kano ka jingdheng kali ha ka thaiñ Polo.
