Shillong, Nailar, 25: Ki samla pule Pharmacist na kane ka jylla ki la phah da ka dorkhas sha ka Myntri kaba khmih ïa ka tnat ka Koit ka Khiah ka Dr. Mazel Ampareen Lyngdoh ban pyntip ba katkum ka jubab Right to Information (RTI) kaba ki la ïoh pdiang na ka ophis Directorate of Health Services (M.I) la pyntip ba ka Sorkar kam shym la pynkha satia ïa ki post na ka bynta ki Pharmacist haduh kine ki sngi.
Ryngkat ka jingsynran lang jong ki paralok kiba la pyndep ïa ka jingpule Pharmacist, u samla Emosjohn Syiemlieh ha ka jingïakren bad ki lad pathai khubor ha ka sngi Saitjaiñ u la ïathuh ba ki la pynsngew ruh ha ka Myntri ka tnat ka Koit ka Khiah ban kham pynbun ïa ka lad thungkam na ka bynta jong ki samla kiba la pyndep ïa ka jingpule Pharmacist da kaba seng ïa ki Pharmaceutical Industries hapoh ka Jylla bad ban thung ruh ïa ki Pharmacist ha ki District Hospital, ki CHC, ki PHC, bad ki Sub Centre katkum ki kyndon jong ka Indian Public Health Standards namarba bun na ki shlem ai jingsumar jong ka Sorkar kim shym la bud satia ki kyndon jong ka Indian Public Health Standards.
U la pynpaw ruh ka jingsngewsih namarba ka tnat ka Koit ka Khiah jong ka Sorkar Jylla ka shu pynthame ïa ki samla tang da ki kam contractual katba ïa ki Permanent Post ka Sorkar ka pynmih duna bha.
“Kane ka dei ka jingeh kaba ngi ïakynduh ynda ngi la pyndep ïa ka jingpule bad bun na ngi, ngi trei ïa ki kam ki bym ïahap bad ka jingpule tang ban ïoh ïa ka kam,” ula ong.
U samla Emosjohn, u ong shuh shuh, ba kum ka kynhun ki la ai jingmut ïa ka Sorkar ban thung Pharmacist uwei ha ki Sub Centre, ar ngut ha ki PHC, 3-4 ngut ha ki CHC, iwei ha UPHC.
Ha ki District Hospital ba don 50 jingthiah dei ban thung 3-4 ngut, 100 jingthiah dei ban thung 4-5 ngut, 200 jingthiah dei ban thung 7-8 ngut, 300 jingthiah dei ban thung 10-12 ngut, 400 jingthiah dei ban thung 13-15 ngut bad 500 jingthiah dei ban thung 16-19 ngut.
Haba kylli u la ïathuh ba haduh mynta ki don kumba lai hajar ngut antad ki samla ba la pyndep ïa ka jingpule Pharmacist hynrei kiba ïohkam ha ki jaka treikam jong ka Sorkar ki duna bha haduh katta katta.
