Shillong, Nailar 25: Ki runar ki bym lah ban ithuh durkhmat ha ka step phyrngab sngi u Blei ha ka por kumba 5:00 baje mynstep ki la leit lute ïa kawei Petrol Pump kaba don ha Umran Diary, Ribhoi District kaba la tip kyrteng kum ka Indian Oil Umran Fuel kaba don harud surokbah National Highway-6.
Ka khubor ba la ïohlum ka ïathuh, katba u Manager u dang thmu ban plie ïa ka Petrol Pump hynrei kynsan kynsan la wan mih kumba saw ngut ki briew bym lah ban ithuh durkhmat kiba la patan beit ïa u bad teh ruh ïa ki kti ki kjat jong u bad ïa ki nongtrei jong ka Petrol Pump.
Watla u Manager u la pyrshang ban ïakhun ïa ki hynrei um shym la lah satia hynrei u la shah ot pynban na ki bynta jong ka kti da ka tari ba ki runar ki pyndonkam ha ka por ba lute.
Hadien ba la teh ïa ki nongtrei, ki runar ki la rong ïa ka pisa kaba la kot da ki lak tyngka kaba dei ka pisa na kaba die ïa ka umphniang petrol ha ka 23 tarik bad 24 tarik mynta u bnai.
Ki runar tang shu ïoh khung ïa ka pisa ki la phet krad na kane ka jaka.
Tang shu ioh jingtip halor kane ka jingjia, ki Pulit jong ka Ri-Bhoi hadien ki la leit mar mar ban pynlong ka jingtohkit bad ban khmih bniah lyngba ka CCTV khnang ban lapdien ïa ki runar ba donkti ha ka kam runar.
