Shillong, Nailar, 26: Ka North East United ka la long kynhun ban ïoh rung sha ka jingïakhun phainal ha ka lympung ïalehkai 133rd Durand Cup, 2024 hadien ba ka la pynliem noh da 3-0 kol ïa ka Shillong Lajong FC ha ka jingïakhun semifinal kaba la long ha JN Complex, Shillong ha ka lah Sngi u Blei.
Ha ka jingïakhun ha ka kylla step, ïa ki ar tylli ki kol na ka bynta ka North East United la ïoh thep da u Thoi Singh ha ka por 13 minit bad u Alaaeddine Ajaraie u rangïalehkai ka Morocco ha ka por 33 minit.
Ynda la wan sa ka jingïakhun ha ka kylla miet, u Parthib Gogoi ula ïoh ban thep ïa ka kol kaba lai na ka bynta ka North East United ha ka por 90+3 minit.
Da kane ka kol ba la ïoh thep da u Parthib Gogoi, ka la biang pura ïa ka North East United ban jam mynta sha ka jingïakhun phainal jong ka lympung ïalehkai Durand Cup, 2024 ka ban sa long ha nongbah Kolkata ha ka 31 tarik mynta u bnai.
Palat 15,900 hajar ngut ki nongkyrshan jong ka Shillong Lajong FC ki la shah pynsngap jar ha ki rangïalehkai jong ka North East United da kane ka jingshah pynliem lyndang jong ka Shillong Lajong kaba kim shym la khmih lynti satia ba kan jia ha kane ka dur.
Ha ka por 90+1 minit, u Referee u la ai Red Card ïa u Ronney Willson u rangïalehkai jong ka Shillong Lajong namar ka jingleh thurmur ha ka por ïalehkai. Da ka jingïoh Red Card jong u Ronney Willson ka Shillong Lajong ka la sah sa tang 10 ngut ki rangïalehkai ha madan.
Wat hadpeng ka jingshah rem, ki paidbah nongshong shnong jong ka jylla Meghalaya kin ïai sah kynmaw pateng pakit ïa ka kynhun ialehkai jong ka Shillong Lajong kaba la lah ban pynliem ïa ka kynhun ïalehkai jong ka East Bengal FC na Kolkata ha ka jingïakhun Quarterfinals.
