Shillong, Nailar, 27: U MP ka Shillong u Dr Ricky AJ Syngkon ha ka sngi Ba-ar u la leit ban jurip ïa ka NEIGRIHMS Hospital, na ka bynta ban khmih ïa ki jingduna kiba don hapoh ka hospital bad ïakren ruh ïa ki bor pynïaid bad ïa ki nongtrei bad ki paidbah kiba shah sumar ha kane ka Hospital.
U Dr Ricky u la leit ban jngoh ïa ki Department kiba pher bapher jong kane ka hospital ban sngap ïa ka jingeh kaba ki ïakynduh khnang ba un sngewthuh naduh tynrai ïa ka jingeh kaba don ha kane ka hospital khnang ba un dup lah ban ai jingmut sha ka Ministry of Health and Family Welfare ka Sorkar India.
Ha kane ka sngi u Dr Ricky u la leit ban jurip ïa ka Central Library bad ïa ki jaka leh tes bapher bapher kiba don ha kane ka Hospital.
Ha ka jingïakren bad u Medical Superintendent u Prof. (Dr) C Daniala u la ong ba ki jingduna kiba don ha NEIGRIHMS Hospital ki dang bun bad ka jingeh kaba ki nongtrei ki ïakynduh.
U la ong ba jingwan iuhkjat jong u MP kan dei ka sienjam kaba biang na bynta ban ai jingïatreilang ban kham pynbha shuh shuh ïa kane ka jaka ai jingsumar.
U la ong ba ki nongtrei bad ki kynhun bapher bapher ki la ïoh ban pynsngew ïa ka jingeh kaba ki ïakynduh bad ban wad ïa ki lad ki kumno ban weng ïa kane ka jingeh. U la ong ruh ba na ka liang ki bor pynïaid ki ap khmihlynti ba ka jingangnud ban kynthup noh ïa kane ka jaka ai jingsumar ha ka thup jong ka Institute of National Importance (INI) khnang ba ki Course kiba dei ban leh yn lah ban leh beit kumba kiwei ki shlem ai jinghikai bad jingsumar kum ka AIIMS ki lah ban ai.
Ha ka jingïakren bad u Dr Ricky u la pynpaw ba ka dei ka kamram jong u kum u nongmihkhmat ban leit peit ïa ki jingduna hapoh ka hospital khnang ban ïoh pynsngew bad buddien na ki bor ba dei peit ha New Delhi.
U la ong ba watla ka dei ka hospital kaba la rim hynrei u la ong ba dang don shibun ki kam ba hap ban leh ban nang pynbha shuh shuh ïa ka hospital khnang ba kan long ka jingmyntoi ïa ki paidbah ka jylla bad kumjuh ruh ïa kiba na kiwei pat ki jylla jong ka thaiñ Shatei Lam Mihngi .
U la ong ba un ïai buddien ban pynlong ïa ka NEIGRIHMS Hospital kum ka Institute of National Importance (INI) bad u la ong ba da ka jingïatreilang ki doktor, ki nurse, ki nongshah sumar bad ki nongtrei hapoh kane ka hospital yn sa lah ban pynurlong ïa kata ka jingthmu khnang ba kan long ka jingmyntoi ïa ki nongshong shnong ka jylla bad ka thaiñ Shatei Lam Mihngi ka ri.
