Shillong, Nailar, 27: Ki shipai BSF jong ka 4th Battalion, Meghalaya da ka jingïatreilang bad ki bor Pulit, ka ophis Custom bad ka LPAI, ki la ïoh kurup ïa ki tiar khaii tuh ba la kit lyngba kawei ka Bos Shillong-Dhaka Maitri bad kem ruh lai ngut ki nongtrei jong kane ka bos kiba dei ki nongshong shnong jong ka ri Bangladesh katba ki dang leit phai sha Bangladesh lyngba ka ICP Dawki.
Ha ka jingkhynra, ki shipai BSF ki la kurup ïa ki rupa, ki jaiñ saree, ki tiar elektronik kynthup ruh ïa ki mobile phone, headphone, bad ki tiar mobile kiba shongdor palat T. 48 lak ba la buhrieh hapoh ka Bos.
Ha ka jingtohkit, ki nongtrei kim shym la lah ban pyni ïa ki kot ki sla na ka bynta kine ki tiar.
Ïa kine ki tiar ba la ïoh kurup bad ïa ki nong Bangladesh kiba la shah kem la shimti noh da ka ophis Customs ha Dawki na ka bynta ban pynlong ïa ka jingtohkit kaba bniah bad ban pynngat katkum ki kyndon jong ka aiñ.
