Shillong, Nailar, 27: U Secretary Shnong jong ka shnong Nongsohphoh, Upper Mawprem u Bah Hardy Ryntathiang u la shah ujor da ka ejahar bad shah khot hajir ha ki Pulit jong ka Lumdiengjri Police Station ha ka sngi Baar tang na ka daw ka jingkhynra drok jong ka Joint Action Committee (JAC) ha ka 17 tarik mynta u bnai.
Ki kynhun kiba don hapoh ka JAC ban leit khynra drok ki kynthup ïa ka Khasi Students Union bad ka Federation of Khasi Jaiñtia and Garo People, Mawprem Circle ka shnong Mawbah bad ka shnong Nongsohphoh.
Ki paidbah nongshong shnong jong ka shnong Nongsohphoh naduh ki samla bad ki longkmie ki la leit ban synran lang ïa u Secretary Shnong sha Lundiengjri Police Station katba u dang leit shah hajir.
Ki longkmie jong kane ka shnong ki la kam ba ha ka jingkhynra drok dang shen da ka JAC la ïohbat ïa uwei u nongkhaii drok bad ha ka jingtian bishar ha Community Hall da ka Dorbar Shnong u la phla ba u la ïoh ïa u drok na ka kiaw kurim bad na ka hymmen kynsi.
Ki la ïathuh hadien kane, saw ngut ki dkhot jong ka Seng Longkmie ki la leit khot ïa ka kiaw kurim bad ïa ka hymmen kynsi jong utei uba la shah bat ha ka JAC bad kam ruh ba ynda la wan ïalam sha Community Hall ym shym la don satia mano mano ruh ba ktah kti ïa ka.
“Hynrei da mynta pat ngi bna ba ka ai ejahar ïa u Secretary jong ka shnong ba u ktah kti ïa ka. Ngi kum ki seng longkmie ngi don lang hangto (ha kato ka sngi) hynrei khlem don ba ktah kti mano mano ruh,” la pynshai ki longkmie.
“Ynda la wan ïalam sha Community Hall, ki wan hi da ki Pulit bad dei ma ngi hi ki seng longkmie kiba leit on ïa ka sha Police Station,” ki la ong.
Ki la ïathuh ba watla ka briew kaba mudui ejahar pyrshah ïa u Secretary jong ka shnong Nongsohphoh ka sah ha ka jaka kaba hap ha ka jingpeit jong ka Shillong Cantonment Board hynrei kum ki longkmie ki pynpaw ka jingsngewkhia bad ki kynnoh ruh ba ka jingwan ïaid lynti jong kane ka briew na ka shnong Nongsohphoh ki khun ki kti kiba dang 12 snem bad 13 snem ki la jot lut tang namarba ki la ngop ha ka jingdih drok.
“Manla ki longiing ki la shah ktah lut. Ngi kwah ba ki bor sorkar kin peitngor ïa kum kine ki jingjia. Jan baroh ki briew ki tip lut ba ïoh na ka shnong jong ngi,” la ong ki dkhot ka seng longkmie Nongsohphoh.
Ki la pynshai ruh ba ka jingleit synran ïa u Secretary Shnong sha thanat ka long ban pynshai hakhmat ki Pulit ba ym shym la ktah kti satia ïa ka briew ba la kynnoh ba ka dei ka nongkhaii drok.
Haba kylli, ki la ïathuh ba ka jingkhot hajir hapoh ka Community Hall ka long ha ka 17 tarik mynta u bnai katba ka briew ba la shah kynnoh nongkhaii drok ka la ujor ejahar sha ki Pulit haduh ka 21 tarik mynta u bnai.
Ki la ïathuh ruh ba naduh u snem 2000 ki la sdang ban bna ba nongshah kynnoh ka donkti ban khaii ïa u drok tangba kim lap sabut bad ïathuh ruh ba ka la ju shah kem ha ki Pulit ka Jylla bad ha ki Pulit ka Jylla Assam.
U Secretary Shnong jong ka shnong Mawbah Nickey Lyngwa haba kren sha ki lad pathai khubor hadien ba la mih na thanat u la ong, “kum ka JAC ngim shym la shim ïa ka aiñ ha ka kti hynrei ynda ngi la kem ruh ngi la pyntip sha ki bor ba dei peit hynrei kyndit ban tip ba u Secretary Shnong jong ka shnong Nongsohphoh u la ïoh da ka shithi shah khot hajir.”
Haba kynthoh ïa ka jingshah khot hajir jong u Secretary ka shnong Nongsohphoh u Bah Lyngwa u la ong, “ha kano ka rukom ngin ïatreilang bad ka Sorkar lane bad ki Pulit. Lada ïa u Secretary Shnong ba la pynkupbor da ka District Council u dang shah khot hajir kumne, ki briew kumno kin mih shakhmat. Ïa ki briew kiba la lap pylleiñ pylleiñ da ki paidbah bad ki sengbhalang bad ki bor shnong hynrei tang khyndiat kynta ki la lait (na ka kti jong ka aiñ). Hato ka mut aiu, ka don aiu sha lyndet? Ïa u briew uba trei hok la khot hajir. Kata ka dei ka jingkylli kaba ngi kwah ban ïoh jingpynshai.”
“Myn ha kane, ngi dang don ka jingïalang bad ka Sorkar bad ki la ong ba ka iktiar shnong ka dei kawei kaba lah ban pynduhjait ïa ki kam sniew. Kum ka shnong ngi la leh ïa ka kamram hynrei kaba sngewsih mynta ka long ba ngi hap ban hajir pynban kumne katba kito ki briew kiba die ïa u drok ki ïaid sharum shaneng ki peit da ki khmat kiba heh ba heh ïa ngi ki nongpynïaid shnong. Shatei ka jingshngaiñ bad shaei ka lawei jong ki khynnah kiba dang heh dang san,” la ong u Bah Lyngwa.
U President ka FKJGP u Bah Reginald Thabah u la ong, ‘kaba sngewlynngoh ka long ba kita kiba leh ïa ki kam sniew ki ujor ejahar pyrshah ïa u Secretary Shnong jong ka Nongsohphoh. Kine kiba leh ïa kine ki kam sniew. Ki nongdie ïa u drok ki dei ki mynder kiba wan na kaei ka jaka ngim tip. Ki la nud bad ki la shlan ruh ban ai ejahar wat ïa u Secretary Shnong uba la pynkupbor da ka District Council. Ka JAC kan ym shong kli kti lada ki nongwei nongar ki kwah ban pynbor ïa ngi kiba longtrai ha la ka ri bad ngim banse wat lada donkam ban shim ïa ka aiñ ha ka kti.”
U la kam ruh ba ka briew kaba la shah kynnoh nongkhaii ka dei ka nongkhaii drok kaba heh bad kaba la shah ujor ejahar ha kiba bun ki Police Station ha ka Jylla Meghalaya.
U Bah Aris Thabah u la ong ruh ba ka JAC kan ym shong kli kti hynrei kan dang pynjur ïa ka jingkhynra bad lada ka Sorkar ka treikam lane kam treikam ka JAC kan trei la ka jong ka kamram.
