Shillong, Nailar, 31: Haduh 269 ngut ki nongjop na ki 55 tylli ki jaka ai jinghikai ha Shillong bad Sohra ki la ïoh pdiang ïa ki khusnam ha ka jingïakhun halor ka deiriti kaba 50 kaba la long ha ka sngi Saitjaiñ ha Ramakrishna Mission Vivekananda Cultural Centre, Quinton Road, Shillong.
Mynta la sanphew snem kynthih, ka Ramakrishna Mission, Shillong ka ju pynlong ïa kane ka jingïakhun manla u snem ban plie lad ïa ki khynnah rit kiba don ïa ki sap ki phong ba kin pyni halor rynsan.
Ki don palat 3300 ngut kiba la pynrung kyrteng ha ki jingïakhun na ki 89 tylli ki shlem pule bad 2072 ngut ki la ïashim bynta ha kine ki jingïakhun.
U Lat ka Jylla C. H. Vijayashankar, u la sakhi lang ha kane ka sngi kum u Kongsan.
Haba kren kum u Kongsan, u Lat u la pynkynmaw ïa ki kyntien jong u Swami Vivekananda bad u la ong ba u sngewkmen ban ïoh lad na ka bynta ban ai jingkren na kane ka juh ka rynsan ba la pynkyntang da u Swami.
U la kyntu ïa baroh ba kin don ka jingpynleit jingmut kumba la hikai u Swami Vivekananda kaba lah ban ïarap bha ïa ki. U la ïaroh ïa ki sienjam jong kito kiba la pynlong ïa kane ka jingïakhun la 50 snem mynta.
U Swami Achyuteshanandaji Maharaj uba dei u dkhot jong ka Governing Body ka Ramakrishna Mission Belur Math, u la pynkynmaw ïa baroh shaphang ki jingai jingshakri jong ka Ramakrishna Mission khamtam ha Meghalaya ha kaba ka la trei ban pynïajan ïa ki jaitbynriew.
Ka jinglong jingman jong kane ka jaka bad ka jingpdiang jong ki briew jong ka ki dei ka nuksa ïa baroh kawei ka ri, u la ong.
U Managing Director jong ka Meghalaya Co-operative Apex Bank Ltd, Shillong Bah Osmond Ewen Jyrwa Nongbri, u la pynpaw ïa ka jingkmen ban ai jingkyrshan ïa ki khynnah bad ki samla jong ka nongbah kiba don sap.
Ha ka jingai jingkren sngewnguh, u Swami Vedeshananda Maharaj u la pyntip ïa baroh ba u snem 2024 u long uba kyrpang, namar kum shi bynta ka Golden Jubilee jong kine ki jingïakhun halor ka deiriti, ka long ruh kum ka dak jong ka jingdap 100 snem ka jingai jingshakri ka Ramakrishna Mission ha Meghalaya.
Shwa kane, u Swami Hitakamanandaji Maharaj u la pdiang sngewbha ïa baroh bad u la ong ba kine ki jingïakhun ki dei khnang ban pyntbit shuh shuh ïa ki khynnah kiba don sap bad ruh ban wanrah ïa ka jingskhem jingmut ha ki.
