Shillong, Nailar, 31: Ki nongïalam jong ka Hynñiewtrep Youths Council (HYC) Sengkmie ba la lamkhmat da u Secretary ka u samla Isaac Basaïawmoit ha ka jingpynap shrip ha ka janmiet Sngi Saitjaiñ View Point Mawiongrim, Shillong ki la ïoh bat ïa uwei u snar nongkhaii droks ryngkat kumba 30 ngut ki samla na ki shong bapher bapher ka thaiñ Ri-Bhoi kiba wan ban thied ïa u droks na une u snar nongkhaïi.
Ha u kyrwoh ba la phah da ka seng sha ki lad pathai khubor, la pyntip ba ha ka jingïohbat ïa u snar Nongkhaïì ki dkhot ka HYC ki la ïoh da ki phew tylli ki synduk thep drok kiba rit kiba u dang thmu ban pynïaid iew sha kine ki nongthied kiba shongdor da ki phew hajar tyngka bad ong ruh ba u ladep ruh ban die ïa u drok uba shongdor kumba 30 hajar tyngka ei ei.
Une u briew u dei uba ju ap ïa ka jaka pynieng kali ha kane ka View Point kaba u trei kum u nongap ne nongpynïaid da ka jingaikam jong ka shnong kum ka lad aikam aijam ïa u. Hynrei une u briew u shim kabu ha ka ban leh pat ïa kum kine ki kam be-aiñ ha kane ka jaka, la ong ka seng ha u kyrwoh.
Na ka liang ka Seng ka la thang noh ïa u drok baroh uba la ïoh kurup bad ïohlad ruh ban ïakren bad ki bahaing hasem jong une u briew ban thawlad thaw lynti na ka bynta ban ïalam pat ïa u sha ka lynti kaba beit bad ba un kylla bamut noh na kane ka jinglong kaba mynta.
Ïa kiwei kiwei ruh kiba la ïoh bat ha kane ka sngi, ka seng kan sa leit ban ïa kynduh ïa ki bahaing hasem ban ïakren sngewthuh kumno ban btin lynti ïa kine ki khun samla sha ka lynti kaba beit bad ban pynkylla noh ïa ka jingim ka jong ki.
