Shillong, Nailur, 02: Ki Pulit jong ka Ribhoi District kiba la pynlong ia ka jingtohkit kaba bniah halor ka jingshah lute pisa jong ka Umran fuel/Petrol Pump, Umran Niangbyrnai, Ri Bhoi District ha ka 25 tarik Nailar, 2024 ha ka sngi U Blei mynta ka taiew ki la iohkem ia ki lai ngut ki nonglute katba ia uwei pat uba donkti lang ha kane ka kam lute la kem da ki Pulit jong ka Tuensang District Nagaland.
Katkum u kyrwoh ba la phah da u Superintendent of Police jong ka Ribhoi District u Jagpal Singh Dhanoa la iathuh ba kine ki saw ngut kiba la shah kem ki dei kiba la tip kyrteng kum u Bokavi Zhiomomi, 25 snem uba sah ha Veterinary Colony Burma Camp, Dimpur Nagaland, u Pashen Lam, 33 snem uba sah ha Burma Camp, Urban House Block II, Dimapur Nagaland, u Rokonngulie Keppu, 18 snem uba sah ha Raid Bazar, Dimapur Nagaland.
U SP u la iathuh ba sa uwei pat uba la shah bat ha ki Pulit jong ka Tuensang District u dei uba la tip kyrteng kum u Tsalipi, 26 snem ka rta na Dimapur, Nagaland. Ia u Tsalipli la leit shimti mynta da ki Pulit jong ka Ri Bhoi District bad shen yn sa tian bishar ruh ia u ha Kashari.
Ia ka kali Bolero kaba don ia u nombar NL-07-CB-0156 ba la pyndonkti da kine ki runar ha ka kam lute pisa la kurup noh da ki Pulit.
U SP u la iathuh ba kine ki saw ngut ki snar nonglute dang shen ki la leit lute ia ka Umran fuel/Petrol Pump kaba don ha ka shnong Umran Niangbyrnai, Ri Bhoi District ha ka 25 tarik Nailar, 2024 bad hadien ba ki la shoh pynmynsaw ia u Manager bad ia ki nongtrei jong kane ka petrol pump ki la ioh ban lute ia ka pisa kaba kot haduh T. 4,24, 614 lak.
Ia kane ka jingjia, ki Pulit jong ka Umsning Police Station ki la register case hapoh ka Section 309 (2)(6) BNS, 2023.
Ha ka jingtohkit, ki lai ngut ki kubur ba ki dei kiba donkti ha kane ka kam bymman bad shuh shuh u SP u la pyntip ba ia ki lai ngut la tian bishar ha Kashari bad panbor ruh ban set along san sngi na ka bynta ban pynlong shuh shuh ia ka jingtohkit kaba bniah.
