Shillong, Nailur, 09: Ka kynhun ïalehkai phutbol jong ka Jylla Meghalaya ïa kaba la mihkhmat da ka Mynken Christian Higher Secondary School na Ri-Bhoi District ka la pynjem khnap ïa ka kynhun ïalehkai na ka jylla Arunachal Pradesh da kaba pynliem noh da 7-0 kol ha ka lympung ïalehkai Semifinal jong ka U-17 boys’ Subroto Cup 2024 kaba la long ha New Delhi ha ka lah Sngi u Blei.
Haba phai sha ka jingïakhun ha ka kylla step, ka Mynken Christian Higher Secondary School ka la ïoh ban pynkhih nyngkong eh ïa ka jar lyngba u Banganson ha ka por 21 minit, ha ka por 35+1 minit bad ha ka por 46 minit.
Katba sa lai tylli kiwei pat ki kol la ïoh thep da u Mebanlamlynti ha ka por 39 minit, u Alicestar Thangkhiew ha ka minit kaba 44.
Ynda la poi sa ka jingïakhun ha ka kylla miet u Alicestar Thangkhiew u la ïoh ban pynkhih ïa ka jar sa ha ka mint kaba 51 bad nangta shwa ban kut noh ka jingïakhun sa u Mebankhraw uba la ïoh ban bynrap lang ha ka minit kaba 65.
Da kane ka jingjop, ka Meghalaya ka la hap ban pynkhreh ban ïakhun ïa ka phainal pyrshah ïa ka Jylla Manipur ka ban sa long shen.
Dang shen, ka kynhun ïalehkai U-15 jong ka Jylla Meghalaya ba la mihkhmat da ka Nongjri Presbyterian Secondary School ka la ïohrah ïa ka nam lahduh ha ka Subruto Cup.
