Shillong, Nailur, 14: Ki bahaïing hasem jong u samla Steve Jyrwa uwei na ki nongshad ba tbit ha ka sngi Saitjaiñ ki la pan jingkyrshan na ki paidbah nongshong shnong jong ka jylla Meghalaya ban ai vote ïa u ha ka rynsan ïakob shad jong ka India’s Best Dancer Season-4.
Une u samla mynta u dang don sha nongbah Mumbai ban bteng ïa ki jingïakhun kiba dang ïaid shaid shaid bad na ka liang jong ka Directorate of Information and Public Relations ka Sorkar Jylla, ka All Meghalaya Dancers Association bad ka Eastern Dance Icons Dance and Fitness Studio ki la kyrpad ïa ki paibbah nongshong shnong ka Meghalaya ban ai vote ïa u Steve Jyrwa da kaba download ïa ka Sony Liv App ne ka Lenskart manla ka sngi Saitjaiñ bad ha ka sngi U Blei naduh ka por 8:00 baje mynmiet haduh ka por 12 baje mynmiet.
Ka President jong ka BJP Meghalaya Pradesh Mahila Morcha ka Kong Susuki Pariat lyngba u kyrwoh ka la kyrpad ïa ki paidbah ban pynjop ïa u samla Steve Jyrwa ha kane ka rynsan ïakob khnang ba un dup wanrah ïa ka nam ka burom sha ka jylla Meghalaya.
Ha kajuh ka por ka United Democratic Party (UDP) Mawkyrwat Circle ha ka sngi Saitjaiñ ka la lum synñiang ban pynmih pisa na ka bynta ban ai jingkyrshan ïa u samla Steve Jyrwa bad ïa ka Kong Kmoiñ Wahlang ka ban sa leit ïashim bynta ha ka jingïakob mareh Marathon ba la tip kum ka 13th Pan Pacific Masters Games 2024 ka ban sa long ha ka nongbah Queensland jong ka ri Australia ha u Naiwieng, 2024.
Kane ka jingpynmih pisa na ka bynta u samla Steve Jyrwa ka long namarba u dei ruh u samla na ka shnong Jakrem, South West Khasi Hills District uba shong ba sah mynta ha ka shnong Nongmensong, Shillong.
