Shillong, Nailur, 16: Ka Voice of the People Party (VPP) ha ka lah sngi U Blei ka la phah da ka jingthoh sha u Myntri Rangbah ka Jylla u Conrad K. Sangma halor ka jingdawa ban ym ai jingbit ïa ka jingpynbna jong kawei ka seng Niam Hindu ban pynlong ïa ka jingïaid Yatra ha kane ka nongbah Shilllong ha ka 2 tarik Risaw, 2024 ban pynbna ïa ka masi kum ka kmie hapoh ka ri India.
Ha ka dorkhas ba la soi da u General Secretary ka party u Dr. Ricky A.J. Syngkon, ka VPP ka la pynpaw ïa ka jingsngewkhia ha kaba ïadei bad ka jingpynbna ban pynlong ïa ka Gau Dhwaj Sthapana Bharat Yatra ha nongbah Shillong ha ka 2 tarik, Risaw, 2024.
“Watla ngi kyrshan bad pynskhem pura ïa ka nongrim jong ka jinglaitluid ha ka niam kaba la pruiddak ha ka Riti Synshar jong ka ri, ngi sngewkhia shibun eh ïa ki jingktah kiba lah ban mih ha ka imlang sahlang jong ka jylla jong ngi,” ong ka dorkhas.
“Ka VPP ka ngeit ba ka jinglaitluid jong ka jingngeit ka dei ka hok ba kongsan; hynrei lada kata ka jinglaitluid ka pynthut ïa kiwei ne ka pyrshang ban pynbor ïa ki jingngeit ha kaba ïadei bad kaei kaba ki briew ki dei ban bam, kumno ki dei ban im, ne kaei kaba ki dei ban ngeit, kum kine ki kam ki buh jingma ïa ka jinglong tynrai jong ka imlang sahlang jong ngi. Ka Meghalaya ka dei ka jylla kaba la tip bha na ka bynta ka jingpher, ka jingsuk, bad ka jingburom markylliang ha kylleng ki jaidbynriew. Kano kano ka jingjia kaba lah ban pynmih ïa ka jingkulmar ne pynmih ïa ka jingïakynad hapdeng ki jaitbynriew bapher bapher dei ban leh da kaba husiar bha,” la pynpaw ka dorkhas.
“Ngi sngewkhia ba kane ka Yatra ba la thmu ban pynlong ka lah ban wanrah ïa ka jingïapait ïapra bad kan pynthut ïa ka shongsuk shongsaiñ jong ki paidbah ha Meghalaya. Ka jingpher ha ka imlang sahlang bad ka kolshor jong ka jylla jong ngi ka dei ban burom, bad ngim lah ban ailad ïa ki jingjia kiba lah ban wad ban pynduh ne tuklar ïa kane ka jinglong ryntih. Kum kine ki jingleh ki don ka jingma ban pynmih ïa ka jingbym ïasngewthuh jingmut bad jingsngewsih, kaba lah ban wanrah ha kaba kut ïa ka jingbym ïasngewthuh jingmut ha ka imlang sahlang,” ong shuh shuh u kyrwoh.
“Da kaba pyrkhat ïa ka jinglong rit paid jong ka imlang sahlang jong ka jylla jong ngi, ngi kyntu jur ïa ka sorkar ba kan ym ailad ïa ka Yatra ban sa pynlong. Ka jingshngaiñ, ka jingsuk, bad ka jingïatylli jong ki paidbah ka Meghalaya ka dei ban long ka mat ba kongsan jong ka sorkar, bad ym dei ban ailad ïa kano kano ka jingjia kaba thmu ban pynthut ïa kine ki jinglong,” la ong shuh shuh u kyrwoh.
