Shillong, Nailur, 19: Katto katne ngut ki khynnah rit kiba dang thmu ban leit jngi ha wah Umshing ba dang hap hapoh u pud u sam jong ka shnong Mawïong Umjapung, Shillong ha ka sngi Palei ki la kyndit kumba iuh tdong bseiñ ban lap pynban ïa ki ar tylli ki metïap ha kane ka wah.
Ki nongkitkam shnong kiba la leit tohkit tang shu ïoh jingtip halor kane ki la pynshisha ba ki ar tylli ki metïap ki dei kiba la ithuh kum ka Kong Niancy Riahtam bad iwei i heprit kynthei ba la tip kyrteng kum i Erika Thabah ba dang 5 snem ka rta kiba shong basah ha Dong Tariang-A, Mawïong Umjapung kiba la jah naduh hynnin ka janmiet sngi Balang.
U Secretary ka Dong Tariang-A, u Bah Benedict Nongrum, u la ïathuh ba ka Kong Riahtam kaba trei ha Punjab Bank ka la ïalam kai naduh ka por 10:00 baje mynstep ïa i heprit Erika Thabah ban leit peit ïa ka ïing ba dang shna hajan ISBT Mawïongrim.
U la ïathuh ba ka Kong Niancy ka dei ka bym shong kurim bad namarba ka dei kaba sah marjan bad i heprit Erika kumta ka ieid bha ïa i bad ïalam kai manla ka por.
“Ha ka por 4:00 baje janmiet, ki don ki nongshong shnong kiba la ïohi ba i la wan phai sha dong bad ngim tip ha kano ka lynti i ïaid, la i rung shapoh dong ne ïaid shano shano bad ki don ki nongshong shnong kiba lap ba i hiar kali ha Macdonald Road,” la ong u Bah Nongrum.
U la ïathuh hadien ba ki bahaing hasem ki la pyntip sha ki bor synshar shnong ba ka Kong Niancy Riahtam ryngkat bad i heprit Erika Thabah kim shym la wan phai shuh sha la iing mar mar na ka liang jong ka dong ka la pyntip noh sha u Rangbah Shnong bad sha ki bor Pulit.
“Hynnin ka sngi ki bor shnong, ki longkmie bad ki seng samla shnong naduh ka por 10:00 baje mynmiet ngi la ïa wad sha ka Dong Lumpyllon jong ka shnong Mawïongrim haduh ka por 3:00 baje mynstep. Namarba ngim lap ngi la rai ban bteng biang ïa ka jingwad shnong sa mynta ka step,” u la ong.
Haba kylli, u la ïathuh ba la lap ïa ka met jong ka Kong Niancy bad i heprit Erika dei na ka jingleit jngi jong ki khynnah rit ha Wah Umshing kiba la leit pyntip ïa kane ka jingjia sha ki bor shnong ha ka por 12:30 baje noh sngi.
U la ong ruh ba kum ka shnong kam pat lah ban suba sniew ïano ïano ruh hynrei kum ka shnong ka shaniah beit ha ki bor Pulit ban pynlong ïa ka jingtohkit kaba bniah ban lap ïa ka daw.
Namarba kane ka jingjia ka la buh ïa ki paidbah nongshong shnong ha ka umdum, ki Pulit na ka Forensic Science Laboratory ruh ki la hiar sha kane ka jaka ban pynlong ïa ka jingtohkit watla ïa ki met ïap la lap naduh ka por 12:30 baje mynsngi hynrei la sei noh na wah Umshing haduh ka por kumba 6:00 baje janmiet ha kaba la pynkit noh sha NEIGRIHMS Hospital ban leh ïa ka post mortem.
