Shillong, Nailur, 20: Ka Khasi Students Union (KSU) Narpuh Circle ha ka sngi Thohdieng ka la phah da ka dorkhas sha ka Meghalaya State Pollution Control Board (MSPCB) ban pyrshah ïa ka jingtyrwa jong ka M/s Meghatop Cement Private Limited ban tei ïa ka karkhana pynmih dewbilat bad ïa ka Captive Power Plant ha ka shnong Wahïajer, Elaka Narpuh, East Jaiñtia Hills District.
Ha ka dorkhas, ba la soi da u President ka KSU Narpuh Circle u Bah KS Suchiang bad u Secretary u Bah WD Gympad, ka seng ka la pynksan ba lada ai jingmynjur ban dang shna ïa ki karkhana pynmih dewbilat thymmai kin ym lah ban pynurlong ïa ki jingdawa ba kongsan.
Ka Seng ka la ong ba ka jingbuh sngi da ka Meghalaya State Pollution Control Board ban pynlong ïa ka jingpynsngew paidbah ne ka Public Hearing ha ka 18 tarik, Risaw, 2024 ka dei kaba khlem da ïoh jingmynjur na ka Dorbar Elaka. Ka No Objection Certificate (NoC) ba shi por ba la ai da u Dolloi ka Elaka Narpuh u Bah Manbha Kyndoh ha ka 3 tarik Naiwieng, 2022 kam dei ka NoC kaba shong aiñ hynrei ka dei tang ka jingkular. Ka Jaiñtia Hills Autonomous District Council (JHADC) ka la pyndonkam bakla ïa kane ka (provisional NoC) ban ai ïa ka NoC ïa ka M/s Meghatop Cement Private Limited.
Ka KSU ka la pynksan ruh ba ka long ka bym lah shuh ban pdiang ban mynjur ban dang don shuh shuh ki karkhana pynmih dewbilat hapoh ka jylli ba la don lypa palat 10 tylli ki karkhana kiba ïa jngai tang 5 kilomitar. Kane kan buh jingma ïa ka mariang.
“Ka projek dei ban kynthup ïa ka jingsiew bailutksan bad ban peit ruh ïa ka jingpyntreikam ïa ka Project of Affected People (PAP), da kaba wanrah ïa ki kam pynroi lyngba ki jingthung tynrai dieng, ka jingbei jingïarap ïa ki shlem pule bad ka jingai ïa ki song pynroi,” la ong ka seng ba kine ki jingkular kim ju urlong satia.
Dei ban thaw ïa ka komiti kaba kynthup ïa ki nongmihkhmat na ki dorbar shnong khnang ban pynthikna ïa ka jingïada ïa ka mei mariang.
Shuh shuh ka KSU ka la ong ba ka East Jaintia Hills District ka la sakhi ïa ka jingjot jong ki lum ki wah na ka daw ka jingdon jong ki 10 tylli ki karkhana. Kine ki karkhana ki la pynjaboh ruh ïa ka mariang jong ka Elaka Narpuh bad ïa ki shnong ba marjan ba kynthup ïa ka Umlong, Moosiangmare Old bad New, Um Myrsiang, Umlaper, Mynkre, Wahïajer Narpuh bad bun kiwei kiwei pat. Ka Wah Urdula, Wah Lunar bad Wah Lukha ki la shah pynjngut da ki jingpyntuid jaboh na kine ki karkhana kaba la buh jingma ïa ki dohum, ki mrad ki mreng bad ïa ki paidbah.
“Wat hapdeng ki jingkular ban aikam aijam ai ki trai shnong, hynrei kumba la ïohi ïa ki jingjia ba ladep, bun ki kam ki jam la ai sha ki briew kiba nabar, kat haduh ba la wanrah ïa ka jingjyllei jong ki bar jylla. Kane ka la buh jingma ïa ki trai shnong, kiba la kylla ritpaid ha la ka jong ka jaka,” la pynpaw ka KSU.
