Shillong, Nailur, 23: Ka Khasi Students’ Union (KSU) lyngba ka Employment Monitoring Cell ha ka Lah Sngi u Blei ka la aiti da ka dorkhas ha u Development Commissioner jong ka tnat Planning, Investment, Promotion & Sustainable Development Department (PIPSDD) u Sampath Kumar hadien ba kane ka tnat ka la aiti sha ka Bharti Institute of Public Policy (ISB) ban thung ïa ki 28 tylli ki post hapoh ka jylla ki ban long kum ki Consultant ki ban ïarap ïa ki District Magistrate bad ïa ki Deputy Commissioners.
Ka Seng ka lap ba la pynbha paidbah ïa kine ki kam ba lait tang ha LinkedIn kaba long tang kum kawei ka Social Media App ïa kaba ym shym lah pyllait paidbah lyngba kiWebsite jong ki tnat treikam ka Sorkar ne ha ki kotkhubor.
“Kane ka jingleh ka wanrah ïa ka jingthungkam sop sop khlem da pyntip ïa ki samla wad kam jong ka jylla,” ong ka KSU ha u kyrwoh ba la phah sha ki lad pathai khubor.
“Shuh shuh, ym shym la pyntip bniah halor ka rukom ban shah jied ne mano ban lah ban aplai ïa kine ki kam ba lah buh,” la ong ka seng.
“La lap ruh ba kane ka Agency ka buh kyndon ba 50% na kine ki post yn leit sha ki briew kiba nabar jylla bad ïa kane hi na ka liang ka KSU ka ym lah ban pdiang bad tang ïoh ujor la weng noh ïa kane,” la pyntip ka KSU.
“Ka Seng kam lah ban sngewthuh ba balei ba hap thung ïa kine ki Agency ban ïarap ïa ki Districts Magistrate bad ki Deputy Commissioners kiba la pas ïa ka eksamin MCS/IAS bad kiwei kiwei ki eksamin. Hato kine District Magistrate bad ki Deputy Commissioner kim dei ki briew kiba lah tbit lypa ban pynïaid ïa kino kino ki skhim ne ban peit ïa kino kino ki ishu ba ki shah thung ha kine ki post,” la buh jingkylli ka KSU.
“Ka Seng ka lap ba lah jyllei kine ki Consultancy Agencies ha ka Secretariat bad manla ki tnad jong ka ophis Sorkar. Kaei ka jingmyntoi ba ngi ki paidbah ki ïoh na kum kine ki Agency, ka kam aiu ba ki trei ba ki nongtrei Sorkar kim lah bad ka Policy aiu ki la lah ban shna na bynta ka jingbha jong ka imlang sahlang. Kine ki Agency ki shu pynsyrwa ïa ka pisa u paidbah bad la thaw khnang ïa kine ki Agency tang ban pynrungkam pynrung jam ïa ki khun jong ki heh ki haiñ. Tang katto katne ngut hi kiba ïoh da ka hok bad jingnang jingstad lajong,” la kynthoh ka KSU.
Ka Seng ka ai jingmut ba lada donkam ïa kino kino ki Research ne ki Project ne Data Collection, ka Sorkar ka dei ban ai sha ka NEHU ne kiwei ki skulbah jong ka Jylla khnang ba ki samla jong ka jylla hi kin ïohkam bad kan plie lad ïa kiwei ki bynta jong ka pule puthi bad ki trai jylla hi kin sngewthuh kham bha ïa ka jylla lajong ban ïa ki Agency kiba na shabar.
Ka Seng ka dawa ba lada ka Sorkar ka ïaid shakhmat ïa kane ka kam lyngba kane ka Agency, ka dei ban thep beit thik tang ïa ki trai muluk trai jylla ha baroh kine ki 28 tylli ki posts bad lada long da kumwei ka seng ka nym ailad.
Ka Seng ka la ban ruh ba dei ban thungkam lyngba ki eksamin hynrei ym ban shu thung khlem don kino kino ki kyndon ba biang.
Na ka liang jong u Sampath Kumar u la kular ban shimkhia halor ki mat bad ki jingmut ba la ai da ka Seng ha ka jingïakynduh markhmat bad ki nongïalam ka KSU.
