Shillong, Nailur, 28: Ki Pulit ka ZigZag Police Station na South West Garo Hills District kiba la ïoh ïa ka jingtip kaba bniah na ki shipai Border Security Force (BSF) jong ka 50 Battalion ha ka sngi Thohdieng ki la ïoh kem ïa ki 10 ngut ki mynder Bangladesh kiba dang wan na Purakhasia da kawei ka kali Auto Rickshaw.
Ki Pulit jong ka ZigZag ki la ïohkem ïa kine ki shiphew ngut da ka jingïatreilang bad ki shipai BSF ka 100 Battalion ha kaba ki la pynlong ïa ka jingpynap shrip ha Purakhasia ban talasi ïa ki kali kiba ïaid lyngba na ka shnong Dalu bad Ampati.
Hadien ba la ïoh jingtip ba ki mynder Bangladeshi ki la dep jam shakhmat, mar mar ki la ai jingtip sha ki Pulit jong ka ZigZag Police Station ha kaba ki la ïohbat ïa kine ki shiphew ngut ki mynder ri.
Ïa kine ki shiphew ngut la tian bishar hapoh ka Kashari na ka bynta ban pan bor ban ïoh pynlong ïa ka jingtohkit kaba bniah ïa ka leit ka wan jong ki.
