Shillong, Nailur, 30: Ki Pulit ka Rynjah Police Station kiba la register case ïa kawei ka jingshah tuh jong ki tiar hapoh ki kyndon 329(4), 324(2), 305(a) bad 3(5) jong ka Bharatiya Nyaya Sanhita, ha ka janmiet sngi u Blei ka 29 tarik u Nailur, 2024 ki la ïoh ban kurup ïa ki tiar tuh hajan 4th Furlong.
U Superintendent of Police jong ka East Khasi Hills District u Bah S. Nongtnger ha u kyrwoh ba la phah sha ki lad pathai khubor u la ïathuh ba tang shu ïoh jingtip halor kane, ki Pulit jong ka Nongmensong Out Post ki la leit sha kane ka jaka bad ha ka jingtohkit ki la lap ïa kawei ka trok hynriew shaka kaba don ïa u nombar ASO1CC-3985 kaba la thep ïa ki tiar jot ba la ithuh kum ki tiar tuh.
Ki tiar kiba la ïoh kurup napoh ka trok ki kynthup ïa ka Beam Web Assembly: 10 tylli, ki Shuttering Jack: 32 tylli bad kawei ka mobile phone lem bad ka simcard. Nalor kata, ki Pulit ki la ïoh ruh ban kurup ïa kawei ka kali Local Taxi kaba don ïa u nombar MLO5 K-7554 ha kaba ïadei bad kane ka jingjia.
Ha kawei pat ka jingjia kaba la register ïa ka case ha Sadar Police Station hapoh ki kyndon 417/420 jong ka Indian Penal Code, ki Pulit ki la ïoh kurup ïa kawei ka kali na nongbah Imphal jong ka jylla Manipur.
Ka jingïoh kurup biang ïa ka kali ka long hadien ba la ïoh pdiang ïa ka jingujor pyrshah ïa u Mohammad Fareed, uba sah ha ka shnong Barapathar Mawbah, Shillong.
U nongujor u kynnoh ba u Fareed u la pynbor ba un long u Guarantor na ka bynta ban thied ïa ka kali Maruti Suzuki Eeco 5 STR bad ïa ka kali ruh yn register ha ka kyrteng jong u nongujor, ha kaba une u nongujor u la hap ban siew kylla ïa ka EMI.
Hadien ka jingtohkit kaba bniah kaba khlem shongthait, ki Pulit ki la ïoh ban kurup biang ïa kane ka kali bad wanrah noh sha Shillong.
U Superintendent of Police jong ka East Khasi Hills District u la ïathuh ba jingtohkit ïa kine ki ar tylli ki case ka dang ïaid shakhmat ban lap ïa ki jingpynshisha.
