Shillong, Nailur, 30: Ka ‘The Ultimate Legend Bikers’ Association’ kawei na ki kynhun ñiah thuk thuk ar shaka bapawkhmat ha ka jylla Meghalaya ryngkat ka jingïatreilang bad ka Extension Services Cell (NSS, NCC, YRC bad ka Rangers jong ka Lady Keane College, Shillong ha ka Lah Sngi u Blei ki la mih shakhmat pynsngewthuh bad ban ïalap sha ki paidbah nongñiah kali saw shaka bad sha ki nongñiah thuk thuk ar shaka ba kin bud ryntih ïa ki kyndon ain ñiah kali khnang ban ïada ïalade bad ïa kiwei pat ki nongñiah kali ha surok bad ha kajuh ka por ban kohnguh ruh ïa ki Pulit pynïaid kali jong ka Shillong Traffic Police khnang ban pynduna ïa ka jingdheng kali kaba la palat liam ha nongbah Shillong.
Kane ka kynhun ka la sdang ïa kane ka jingïalap na khyrdop jong ka Inter State Bus Terminus kaba don ha ka shnong Mawiongrim bad ka la pynkut pat ha Khyndai Lad ban pynlong pat sa ïa ka jingïalang paidbah kaba lyngkot ba la ïashim bynta lang da u Additional Deputy Commissioner u Bah Ronnie Wahlang uba la long kum u kongsan, u Working President ka TULBA u Bah Kyrshanlang Nongbri, u Inspector Das Gupta na ka Shillong Traffic Police uba la pyni nuksa da ki kti ïa ki rukom pynsangeh kali jong ki Pulit.
Ha kane ka sngi, ki dkhot ka TULBA ki la sam ruh ïa ki kot lyngkdop sha ki nongñiah kali saw kiba batai ïa ki kyndon aiñ ñiah kali.
