Shillong, Jylliew, 01: Ka tnat PHE jong ka Sorkar Jylla lah ban ong ba ka dei kawei na ki tnat treikam kaba kongsan bha ban ai jingshakri ïa u paidbah ka jylla hynrei ka jingleh mon jong ka pat ka la pynmih ïa ka jingbynñiaw na ki paidbah nongshong shnong.
Ka jingbym lah treikam kane ka tnat Sorkar lah ban ïohi kyndiang ha kaba ïadei bad ka rukom sam um jong ka ha Mawprem ha kaba ka tnat PHE kam shym la lah ban pynmih um mynta la ar sngi kata naduh ka Lah Sngi U Blei bad kaba la bteng haduh mynta ka sngi Ba-ar jong ka 1 tarik Risaw, 2024. bad kane ka jingbym pynmih um ruh kam shym la wan ryngkat bad kano kano ka jingpynbna kumba la leh dang shen.
Ka la dei ka por ïa ka Ingbishar Meghalaya High Court ban shim sou motu PIL ïa kane ka jingleh mon jong ka tnat PHE ban shu pynjah um ar sngi lynter khlem kano kano ka jingpynbna.
“Ha kaba ïadei bad kane namarba ngi ïohi ki tnat Sorkar hi ha ka jylla jong ngi ki leh mon palat. Ha kato ka jingpynbna ban pynjah um ba ar sngi da ka tnat ruh la ïohi ba la pynbna ban pynjah um ar sngi hynrei la pynmih um pat hadien lai sngi bad ka la biang shisha ba ka Iingbishar kan shim mokotduma ïa kane,” ong uwei u nongshong shnong jong ka Mawprem ha ka jingïakren bad kane ka lad pathai khubor.
Nalor ba ki mar ki mata ki rem lada ka tnat PHE kam pynbiang ka jingsam um ngin hap ban thied sa ka um kane hi kane ka jingkhñiot beit ïa kiba duk ba kyrduh,” u la bynrap.
