Shillong, Risaw, 01: U Bah Onil Talang uba la don mynta kumba 57 snem eiei ka rta ha ka Lah Sngi u Blei mynta ka taiew u la ïoh biang ïa ka jinglaitluid bad wan phai biang sha ri India hadien ba u la shah set along haduh ar snem phra bnai kynthih ha Sylhet District Jail, ha ka ri Bangladesh halor ka jingshah kem khlem nongrim ha ka 8 tarik, Nohprah, 2021 ha ki shipai Border Guard of Bangladesh (BGB).
U Bah Onil uba shong basah ha ka shnong Pyrdiwah, kaba hap hapoh ka Raid Mukertilla, Pynursla Civil Sub Divsion u la shah kem ha ki shipai (BGB) katba u dang leit sum ha ka wah Umngot kaba dang hap hapoh u pud u sam jong ka ri India.
Hadien ka jingshah kem jong u Bah Onil ha u bnai Nohprah, 2021, ki bahaing hasem ki la leit ban ujor da ka ejahar ha ki Pulit jong ka Pynursla Police Station ban pyntip ba une u rangbah uba don san ngut ki khun u la shu jah rngai ha ka por kumba 12:30 baje mynsngi katba u dang leit sum ha ka wah Umngot kaba don marpyrshah jong u mawpud ne International Border Pillar No. 1271.
Ki bahaing hasem kiba don hapdeng ka jingpisa mynsiem namarba kim tip shuh kumno ban leh halor kane ka jingjia namarba u Bah Onil Talang u la shah set along sha kawei pat ka ri jin ar snem kynthih khlem kano kano ka jingïoh jamin, kumta ki leit ban pan jingïarap na u Bah Joannes JTL Lamare.
U Bah Lamare u la buddien bin pa bin ïa kane ka kam bad hadien kata u la phah shwa ïa ka jingpyntip ha ka 23 tarik u Jymmang, 2024 sha u Myntri ka Sorkar Pdeng uba peit ïa ka Ministry of External Affairs u Dr. S. Jaishankar halor ka jingshah kem bad shah set along u Bah Onil ha Sylhet District Jail la jan dap ar snem ha kaba ym shym la ïoh jamin satia.
Ka Ministry of External Affairs (MEA) ka la jubab ïa kane ka jingujor da kaba phah ïa ka jingthoh sha ka ophis Deputy Commissioner jong ka East Khasi Hills District ha ka 2 tarik Jylliew, 2024 bad na ka ophis jong u Superintendent of Police ka East Khasi Hills District ka la pynshisha ïa ka jinglong nong India jong u Bah Onil ha ka 12 tarik Jylliew, 2024.
Mar mar, u Bah Lamare u la phah ïa kine ki jingpynshisha ha ka High Commission of India kaba don ha Dhaka, Bangladesh ban tuklar lem na ka bynta ban pynïoh jamin ïa u Bah Onil.
Hapdeng ki jingïaksaid, ka kam ka la poi sha jyrwit jyrwat namarba ka la khie kynsan ka jingïaumsnam kaba shyrkhei ha ka ri Bangladesh u bnai Nailar 2024 hynrei watla katta u Consular jong ka High Commission of India ha Dhaka, Bangladesh u Devvart Chakraborty u la shimkhia ïa ki shithi jingpynshisha ba la ïoh pdiang da ka Post na ka Ophis Deputy Commisisoner jong ka East Khasi Hills da ka jingbynshet ïa ka kam ha u Sanjay Kumar Bihani uba dei u Second Secretary (Consular) bad ha u Biplab Barman uba la ïarap lang ban buddien na ka bynta ban pynïoh jamin ïa u Bah Onil Talang na along.
Hadien kane, ka High Commission of India ha Dhaka, Bangladesh ka la pyntip sha u Bah Joannes JTL Lamare ba ïa ki dulir kiba ïadei bad ka jingpyllait along ïa u Bah Onil Talang la pynmih da ka Security Services Division (SSD) jong ka ri Bangladesh ha ka 22 tarik, Nailar, 2024. Ïa kane ka jingpyntip la phah ruh sha ki bahaiing hasem jong u Bah Onil Talang ha kaba la bthah ruh ba kin long kiba la pynkhreh ban pdiang bad ban shimti ïa u Bah Onil lyngba ka ICP Tamabil kaba don ha Dawki.
Khatduh ïawai, tang hapoh saw bnai lyngba ka jingtrei shitom jong u Bah Joannes Lamare bad ki bor synshar jong ka East Khasi Hills District ha ka 30 tarik, Nailur, 2024 u Bah Onil Talang u la lait na along jong ka Sylhet District Jail bad u la ïoh ban wan phai sha la ka ri ban ïashem biang bad la ki baieid ba thoin bad ïa ki bahaing hasem ha ka shnong Pyrdiwah.
